Parliament of Tanzania

Contributions By: Hon. Khadija Salum Ally Al-Qassmy

All Contributions

Makadirio ya Mapato na Matumizi ya Serikali kwa Mwaka wa Fedha 2017/2018 - Wizara ya Ujenzi, Uchukuzi na Mawasiliano

MHE. KHADIJA SALUM ALLY AL-QASSMY: Mheshimiwa Mwenyekiti, kwanza sina budi kumshukuru Mwenyezi Mungu kwa kunipa afya na uzima nikaweza kuchangia kwa maandishi hoja hii iliyoko mbele yetu. Vilevile sina budi kukupongeza wewe pamoja na Naibu Spika, na Wenyeviti wote kwa kuliongoza Bunge lako Tukufu kwa busara na uvumilivu mkubwa.

Mheshimiwa Mwenyekiti, kwanza napenda kuchangia kuhusu barabara ya Chalinze na barabara sehemu ya Mtumbatu kuelekea Gairo kwenye kilima, kama sijasahau ni sehemu ya Ibete. Barabara ya Chalinze ni sugu na inatumia pesa nyingi kwa matengenezo, kwa ushauri wangu nahisi Serikali sehemu hizi zote mbili ambazo ni sugu ni bora Serikali ingezijenga kwa kutumia zege badala ya lami ili kuokoa pesa nyingi kwa matengenezo ya mara kwa mara. Najua zege ni pesa nyingi lakini ikitengenezwa itachukua muda mwingi bila ya kuharibika. Barabara hizi ni hatari hasa ukipita usiku zinaweza kusababisha madhara makubwa.

Mheshimiwa Mwenyekiti, kuhusu viwanja vya ndege, Serikali imefanya vizuri kwa kununua ndege, lakini viwanja vingi bado ni vibovu na vinabebwa na viwanja vikubwa vitatu tu. Viwanja vingi vinavyojengwa havifiki mwisho, Serikali inatoa pesa kidogokidogo bila ya kufikia mwisho, bora Serikali ingeshughulikia kiwanja mpaka ikakimaliza ili iweze kuleta impact. Kiwanja cha ndege cha Moshi kingeweza kuleta faida kubwa kama kingejengwa kwani kiko karibu sana na Mlima Kilimanjaro, ambapo watalii wengi wanakwenda kupanda, sasa ikitokea ajali inakuwa ni rahisi kuweza kupata usafiri wa haraka kuliko kwenda KIA au Arusha. Kwa kweli, Wilaya ambayo ina biashara kubwa ya utalii ni aibu kuwa haina uwanja wa uhakika na hata kwenye uwanja hapana hata gari moja ya Zimamoto, wanatumia mitungi ya gesi kwa kweli hiyo inatia aibu Serikari yetu.

Mheshimiwa Mwenyekiti, kuhusu mawasiliano na miundombinu ya barabara za vijijini, tumeingia na kutangaza Serikali ya Viwanda huku tukiwa kwenye vijiji ambavyo vinalima malighafi ya hivyo viwanda vyenyewe lakini leo havifikiki kwa barabara mbovu na mawasiliano hakuna, je, kweli tutafika kwenye hiyo dhamira ambayo tumekusudia? Serikali iwe serious kuhakikisha inajenga miundombinu ya uhakika ili tuweze kufikia malengo.

Mheshimiwa Mwenyekiti, miundombinu ni muhimu sana hasa ukizingatia wanawake wengi wanaishi vijijini na wanajishughulisha na kilimo, lakini wengi wanavunjika moyo kwa kukosa barabara pamoja na mawasiliano halafu barabara hizo mbovu zinaathiri sana hasa wanawake
wajawazito wanafia njiani kwa ubovu huo. Serikali kwa umuhimu wa sekta hii ni vema ikaongeza pesa na vilevile izitoe bila ya kuchelewa.

Napenda kuwashukuru Waziri na Naibu wake kwa kujitahidi katika kazi zao pamoja na Serikali kuchelewesha fedha hizo.

Mheshimiwa Mwenyekiti, naomba kuwasilisha.

Hon. Job Y. Ndugai

Speaker of the National Assembly

Legislative Role

Profile

Ask the Speaker / Comments

Dr. Thomas D. Kashililah

Clerk of the National Assembly

Legislative Role

Profile

Ask the Clerk / Comments

Member of the Parliament

View All MP's