Taarifa ya Kamati Maalum iliyoundwa Kuchunguza Mgogoro wa Ardhi kati ya Mwekezaji kwenye Shamba la Malonje na Vijiji Vinavyolizunguka Shamba hilo Kikiwemo Kijiji cha Sikaungu katika Jimbo la Kwela

MHE. ENG. STELLA M. MANYANYA: Mheshimiwa Spika, ahsante sana kwa kunipa hii nafasi. Nami niungane na wenzangu kwanza kumshukuru Mwenyezi Mungu.

Mheshimiwa Spika, pili, nakushukuru wewe mwenyewe kwa kuniamini na kuniweka katika Kamati hii japo kwangu mwanzo ilikuwa ni jambo gumu sana ikizingatiwa kwamba nami niliwahi kuwa Mkuu wa Mkoa wa Rukwa na baadhi ya mambo niliwahi kuyaona toka kipindi hicho na nikaja kushtuka kuona kwamba mambo hayo bado yanaendelea. (Makofi)

Mheshimiwa Spika, sisi wote humu ndani tumeapa kuilinda Katiba ya Jamhuri ya Muungano wa Tanzania. Katiba yetu mpaka leo haijabadilika kwamba sisi ni wananchi tunaofuata misingi mojawapo ikiwa ni misingi ya ujamaa inayozingatia udugu na amani. Nikisema ujamaa wengine wanashtuka. Msishtuke, ndiyo misingi iliyotujenga na ndiyo maana hata mpaka leo tunapofanya mambo yetu tunazingatia huyu mwananchi ana hali gani? Anapata nini? Tupange mambo yetu kwa haki ili wote tuweze kunufaika na tuwe na nchi moja yenye amani. (Makofi)

Mheshimiwa Spika, kwa dhati kabisa Mheshimiwa Mwenyekiti wetu kwanza tunampongeza kwa taarifa ambayo ameisoma kama tulivyoshaurina, lakini kwa unyenyekevu mkubwa na kwa kutoa taarifa za wale wananchi kukushukuru wewe kwa kuthubutu kuunda Kamati hii ili iweze kuchunguza zaidi. (Makofi)

Mheshimiwa Spika, binafsi nimewahi kuwa Naibu Waziri wa Viwanda, Biashara na Uwekezaji. Kwa hiyo, nathamini kabisa uwekezaji na hasa Mtanzania au Watanzania wanapothubutu kuwekeza. Tunatarajia sasa uwekezaji wa hawa Watanzania uwe ni mfano na alama ya uwekezaji tunaoutaka katika nchi yetu kwa sababu wanafahamu vizuri shida za Watanzania wenzao, wanafahamu vizuri mazingira yetu, wanafahamu vizuri nini maana ya ardhi na kila linalotakiwa.

Mheshimiwa Spika, Katiba yetu kama ilivyosemwa Ibara ya nane inazungumzia lengo la Serikali ni kuleta ustawi wa wananchi. Ibara ya tisa ndiyo imefafanua kwa kirefu mno mambo mbalimbali tunayopaswa kufanya. Hapa ningependa kuinukuu hii 9(i) inayosema kwamba matumizi ya utajiri wa Taifa yatilie mkazo maendeleo ya wananchi na hasa zaidi yanaelekezwa kwenye jitihada ya kuondoa umaskini, ujinga na maradhi. (Makofi)

Mheshimiwa Spika, masuala haya yanayoendelea pale Rukwa, kuna wenzetu tunawaacha waendelee kuwa kwenye dimbwi la umaskini, wataendelea kuwa na changamoto nyingi, kwa hiyo, hao maadui wakuu watatu hawataondoka. Hili jambo lina muda mrefu. Kama ni mtoto amezaliwa mpaka ameenda shule, tufikie mahali liishe.

Mheshimiwa Spika, nafahamu wengine wanakuwa na hofu, Serikali italipa hela nyingi sana, Serikali itakuwaje? Jamani hawa mbona wanaamua tu hiyo hawaangalii! Hakuna gharama katika kuondoa shida za wananchi na hakuna gharama katika kutoa haki kwa wananchi. Tumesema haki haikujengwa katika misingi sahihi. (Makofi)

Mheshimiwa Spika, nchi hii ni yetu, na kama ni yetu lazima wote tunufaike nayo kwa uzuri kabisa. Nisingependa nizungumze zaidi, lakini tukumbuke, Taifa hili sasa hivi lina vijana wengi kuliko sisi watu wazima. Pale Sikaungu kote tulipopita vile vijiji ni vijana wenye nguvu wanaotakiwa kupata ajira zao kwa kutumia rasilimali msingi ambayo ni ardhi. Hawana ajira nyingine, lakini wapo. Hata watoto wameshajenga roho ile ya uadui, ya chuki, ya kuhuzunika kwamba hapa tunanyanyaswa. Kwa hiyo, ni kizazi kinaendelea kukua katika misingi kwamba hatuwasikilizi. (Makofi)

Mheshimiwa Spika, yawezekana kuna gharama zitahitajika, lakini Serikali hii imeshawahi kulipa fidia za barabara ili tupate barabara, Serikali hii imeshawahi kulipa fidia kwa mambo mbalimbali ya msingi ilimradi wananchi wake wawe na ustawi. Katika hili, Serikali isimame pamoja na Bunge kuhakikisha mgogoro huu unaisha kwa kutatua tatizo hili kama ilivyopendekezwa, iwe ni mwanzo na mwisho.

Mheshimiwa Spika, Mheshimiwa Waziri wangu mpendwa Mheshimiwa Mzee Lukuvi leo ni Waziri wetu wa Sera, Bunge na Uratibu, tunashukuru kurudi tena kwenye nafasi hiyo na tunampongeza. Tuliongozana wote tukaenda kule Rukwa na alikuwa ameanza vizuri. Kama siyo kesi ile kusimamishwa, alikuwa ana nia njema. Basi Mungu amemrudisha, amalizie tena jambo hilo. (Makofi)

Mheshimiwa Spika, niseme kwamba wawekezaji wamepitia na wenyewe changamoto nzito nyingi kwa sababu jambo hili hata hili la kubaka na vitu gani siyo kwamba vyote vimefanyika leo, ni hatua za safari yote hii tunayoizungumza.

Mheshimiwa Spika, sasa mambo kama hayo, watu wanaongea na tunazo hata video zao ila hatuwezi kuziweka hadharani. Kwa hiyo, ni mambo ambayo ni mazito, siyo nchi hii ya Tanzania. Tanzania haina tabia hii. Hatuwezi kuendelea kuishi kama hivi.

Mheshimiwa Spika, pia kuna wadau wamenifuata hapa wanasema, mama sema tena basi waangalie na mengine. Mimi nasema hii iwe ni mfano na iwe ni kutukumbusha tufanye vipi masuala yetu ya kiuwekezaji? Tunajali vipi wananchi wetu? Tuangalie na maeneo mengine ambayo pengine yana changamoto kama hizi. (Makofi)
Mheshimiwa Spika, ahsante sana. Naunga mkono hoja. (Makofi)