Makadirio ya Mapato na Matumizi ya Wizara ya Ujenzi kwa Mwaka wa Fedha 2024/2025

MHE. INNOCENT S. BILAKWATE: Mheshimiwa Spika, ahsante kwa kunipa nafasi ya kuchangia Wizara hii muhimu. Awali ya yote nimshukuru kwanza Mwenyezi Mungu ambaye amenijaalia kuendelea kuwemo katika Bunge hili kuwatumikia wananchi wangu wa Jimbo la Kyerwa. (Makofi)

Mheshimiwa Spika, kabla sijachangia nichukue nafasi hii kuwapa pole wananchi wangu wa Jimbo la Kyerwa hasa kwenye Kata ya Murongo, Bugomora na Kibare kwa adha ambayo wameipata kutokana na wadhibiti wa magendo ya kahawa. Tayari nimeshawasiliana na Mkuu wa Wilaya na tumeshakubaliana wadhibiti wa magendo waende kwenye mipaka waondoe hii adha ambayo wanaipata wananchi. Ninampongeza sana Mkuu wa Wilaya ameshachukua hatua mbalimbali kwa hiyo ninaamini tabia ya kuwavamia wananchi kwenye nyumba zao haitaendelea. (Makofi)

Mheshimiwa Spika, nianze kuchangia. Kwanza; nimpongeze Mheshimiwa Rais wetu, Mheshimiwa Dkt. Samia Suluhu Hassan, kwa kazi kubwa ambayo anaifanya maeneo mbalimbali. Kwa kweli kwa upande wa ujenzi amefanya mageuzi makubwa, tunampongeza sana. (Makofi)

Mheshimiwa Spika, kipekee nimpongeze sana pacha wangu Mheshimiwa Bashungwa pamoja na timu yake, mnafanya kazi kubwa nzuri sana. Kwa kweli, tumemuona maeneo mbalimbali, kwenye madaraja, mafuriko, mpaka watu wengine wakawa wanasema siku hizi Mheshimiwa Bashungwa amekuwa mkandarasi na ni Engineer kabisa. Tunampongeza sana anafanya kazi nzuri. (Makofi)

Mheshimiwa Spika, nizungumzie barabara zangu ambazo ni barabara ya Omurushaka – Nkwenda – Murongo. Barabara hii ni barabara ambayo inaunganisha Wilaya ya Karagwe ambako unatoka Mheshimiwa Bashungwa lakini pia Wilaya ya Kyerwa. Ni barabara ambayo ni ahadi ya miaka mingi tangu kipindi cha Hayati Benjamin Mkapa. (Makofi)

Mheshimiwa Spika, tunashukuru kwa hatua ambazo zimeanza kuchukuliwa na mama yetu, Mheshimiwa Dkt. Samia Suluhu Hassan. Amesharuhusu barabara hii ya Murushaka – Murongo kilometa 50, ziweze kujengwa kwa kiwango cha lami. Mkandarasi ameshaonyeshwa barabara, kilichobaki ni kupewa advance ili barabara hii ianze. Sasa nikuombe sana Mheshimiwa Bashungwa, barabara hii ni muhimu sana, mlipeni mkandarasi ili aanze barabara hii ili tuondoe yale maneno ya watu ambao hawatutakii mema wanaosema yule mkandarasi aliyepelekwa alikuwa ni Mchina aliyetoka syndicate kwa hiyo tulikuwa tunawazuga. (Makofi)

Mheshimiwa Spika, niongelee tena barabara ya Omugakorongo – Kigarama – Murongo, hii ni barabara ambayo inaunganisha wilaya zetu za Karagwe na Kyerwa na ni barabara ambayo ni muhimu sana. Ninaomba sana Mheshimiwa Bashungwa, baada ya tatizo lililojitokeza baada ya kupata mkandarasi wa kwanza, sasa muitangaze upya. Niombe sana barabara hii iweze kujengwa, iweze kutangazwa na mkandarasi apatikane ili akabidhiwe barabara hii, kazi iendelee. (Makofi)

Mheshimiwa Spika, barabara hizi ninazisemea kwa muda mrefu kwa sababu ya umuhimu wake. Wilaya za Kyerwa na Karagwe ndizo wilaya ambazo zinalima kahawa nyingi sana. Pamoja na wilaya nyingine, hizi ni wilaya ambazo tuna uzalishaji mkubwa wa kahawa na tunaliingizia Taifa fedha nyingi za kigeni. Kwa hiyo, ninaamini tutakapokuwa tumetengeneza barabara hizi, tunaenda kuinua uchumi wa wana-Karagwe na pia uchumi wa wana-Kyerwa na Taifa kwa ujumla. (Makofi)

Mheshimiwa Spika, kwa hiyo niombe sana barabara hizi tuziangalie ili ziweze kutengenezwa. Jambo lingine ambalo nilisemee; Mheshimiwa Bashungwa nikupongeze sana, umeanza kuinua na umekuwa uki-promote sana wakandarasi wazawa. Hili jambo ni zuri sana lakini niombe sana pamoja na kuwainua hawa wakandarasi niombe Mheshimiwa Bashungwa, mjali na malipo yao. (Makofi)

Mheshimiwa Spika, hawa wakandarasi wamekuwa wanakopa hela benki lakini wanapopewa kazi wanacheleweshewa malipo na mwisho wa siku wanaishia kufilisika. Kwa hiyo, niombe sana, pamoja na kuwa-promote tuhakikishe hawa wakandarasi wanalipwa kwa wakati ili tuwainue kifedha waweze kuendelea kufanya kazi kubwa. (Makofi)

Mheshimiwa Spika, baada ya kusema hayo, mimi leo niliona niongelee barabara zangu pamoja na hilo la wakandarasi. Mheshimiwa Bashungwa tunaendelea kukuombea, unafanya kazi nzuri sana na Mungu akufanikishe, akulinde na yale maono yote uliyonayo yaweze kutimia. (Makofi)

Mheshimiwa Spika, naunga mkono hoja. (Makofi)