MHE. RIZIKI S. LULIDA: Mheshimiwa Naibu Spika, nakushukuru kwa kunipatia nafasi hii.
Mheshimiwa Naibu Spika, Mkoa wa Lindi sasa hivi, eneo la Selous pamoja na Mbuga ya Tendeguru kuvamiwa na wafugaji. Mheshimiwa Naibu Waziri ni shahidi, alikwenda akawakuta wafugaji wako ndani ya mbuga, wakichoma mikaa katika Misitu ya Tendeguru na kumaliza Miti ya Mipingo lakini kusababisha sasa hivi taharuki, Wafugaji kutoka katika misitu, kwenda kuvamia mashamba ya watu. Sasa hivi Mkoa wa Lindi tuko katika taharuki kubwa ya mapigano ya wafugaji na wananchi.
Je, Mheshimiwa Waziri aliyepo pale anatoa tamko gani leo hapa kwa vile aliyaona haya lakini utekelezaji wake haukukamilika mpaka hivi sasa?
Mheshimiwa Naibu Spika, nawasilisha swali langu. Ahsante.(Makofi)
NAIBU WAZIRI WA MALIASILI NA UTALII: Mheshimiwa Naibu Spika, ahsante. Sisi kama Serikali tumeshajipanga, kwa maana ya Wizara ya Maliasili na Utalii pamoja na Wizara ya Mifugo na Uvuvi, tukae pamoja kwa sababu suala hili ni suala la wananchi wetu na hao wananchi nao wanayo haki ya kuishi kama Watanzania. Tunachokifanya sasa hivi tunasimamia sheria upande mmoja lakini upande wa pili wanaegesha tu wanasubiria kuingia tena.
Mheshimiwa Naibu Spika, kwa hiyo sisi kama Serikali tukae pamoja, tuone namna iliyo bora ya kuwahudumia hawa wafugaji ili changamoto hii sasa isiendelee kujitokeza. Kwa sababu sasa hivi sisi tumepewa dhamana.
MHE. RIZIKI S. LULIDA: Mheshimiwa Spika, nami nashukuru. Hata ukisikiliza majibu ya Mheshimiwa Waziri, hakutaja watu wenye ulemavu hasa watoto chini ya miaka mitano hawamo katika jumuishi ya matibabu hayo.
Mheshimiwa Spika, je, Serikali ina mpango gani wa kuhakikisha hili kundi maalumu la watu wenye ulemavu wakiwemo watoto wa chini ya miaka mitano wanakuwemo katika jumuishi na kupata haki ya matibabu bure? Ahsante.
NAIBU WAZIRI WA AFYA: Mheshimiwa Spika, kwa kweli katika fedha zote ninazozitaja hapa za exemption, hata unapozungumzia mama na mtoto unamaanisha na mtoto chini ya miaka mitano.
Mheshimiwa Spika, hili eneo nataka kuwaambia, linafanyiwa kazi vizuri na ndiyo maana unaona Mheshimiwa Rais wetu ameleta mashine maalumu ambazo zimesaidia watu ambao wamekuwa miaka sita mpaka kumi ya nyuma na watoto ambao wamezaliwa bila kusikia, sasa wanasikia na uliona walitibiwa bure pale Muhimbili. Makamu wa Rais alikwenda na akabonyeza kitufe na wakaanza kusikia wote kwa wakati mmoja.
Mheshimiwa Spika, kwa hiyo, eneo hili wakati wote linazingatiwa na kwenye hospitali zetu zote tunaendelea kuhakikisha sasa hivi zile process na vitu vyote vinavyoweza kuwasaidia walemavu zinafanyika na tunaweka utaratibu mzuri wa kuwasaidia hao walemavu na wao waweze kuishi maisha kama watu wengine.