NAIBU WAZIRI WA UJENZI NA UCHUKUZI Alijibu:-

Mheshimiwa Spika, kwa niaba ya Waziri wa Ujenzi na Uchukuzi, napenda kujibu swali la Mheshimiwa Amandus Julius Chinguile, Mbunge wa Jimbo la Nachingwea, kama ifuatavyo:-

Mheshimiwa Spika, Serikali kwa kuzingatia umuhimu wa barabara ya Masasi – Nachingwea inayounganisha makao makuu ya wilaya ya Masasi na Nachingwea, imekamilisha kazi ya upembuzi yakinifu na usanifu wa kina tangu mwaka 2015. Kwa sasa Serikali inaendelea kutafuta fedha kwa ajili ya ujenzi wa barabara hii kwa kiwango cha lami, barabara yenye urefu wa kilometa 45. Katika mwaka wa fedha huu 2020/2021, jumla ya shilingi bilioni 1.43 zimetengwa kwa ajili ya maandalizi ya kuanza ujenzi.

Mheshimiwa Spika, wakati Serikali ikiendelea kutafuta fedha za ujenzi pia imeendelea kutenga fedha za matengenezo mbalimbali kwa barabara hii ambapo katika mwaka wa fedha wa 2020/2021, jumla ya shilingi milioni 232.66 zimetengwa kwa ajili ya matengenezo mbalimbali ili barabara hii iendelee kupitika katika majira yote ya mwaka.

Mheshimiwa Spika, ahsante.

NAIBU WAZIRI WA MAJI alijibu:-

Mheshimiwa Spika, ahsante na kwa niaba ya Mheshimiwa Waziri wa Maji, naomba kujibu swali la Mheshimiwa Amandus Julius Chinguile, Mbunge wa Jimbo la Nachingwea, kama ifuatavyo:-

Mheshimiwa Naibu spika, katika kuhakikisha Kata za Kiegei, Kilimarondo, Matekwe na Namapwia zinapata huduma ya majisafi na salama na yenye kutosheleza, Serikali katika mwaka wa fedha 2023/2024 itafanya utafiti wa maji chini ya ardhi (Hydrogeological Survey) pamoja na kuchimba visima virefu vinne katika kata hizo. Kazi hiyo inatarajiwa kufanyika na kukamilika mwezi Disemba, 2023. Uendelezaji wa visima hivyo utafanyika mara baada ya uchimbaji kukamilika na maji kupatikana.

NAIBU WAZIRI WA MADINI alijibu: -

Mheshimiwa Spika, kwa niaba ya Waziri wa Madini napenda kujibu swali la Mheshimiwa Amandus Julius Chinguile, Mbunge wa Jimbo la Nachingwea, kama ifuatavyo: -

Mheshimiwa Spika, Wizara ya Madini kupitia Tume ya Madini hadi Oktoba 2023, imetoa jumla ya leseni 2731 za uchimbaji mdogo wa madini katika Mkoa wa Lindi. Aidha, leseni zaidi ya 200 za Uchimbaji Mdogo wa Madini zimetolewa katika Vijiji vya Kiegei na Nditi Wilayani Nachingwea.

Mheshimiwa Spika, Wizara ya Madini itaendelea kutoa leseni za madini katika maeneo mbalimbali nchini, ikiwemo Wilaya ya Nachingwea na maeneo mengine ya Mkoa wa Lindi kadri itakavyokuwa ikipokea maombi ya leseni kutoka kwa wananchi ili kuwezesha ushiriki wao katika uchumi wa madini, ahsante sana.

WAZIRI WA VIWANDA NA BIASHARA alijibu: -

Mheshimiwa Naibu Spika, nakushukuru, Serikali ilifanya zoezi la tathmini na ufuatiliaji kwa viwanda vyote vilivyobinafsishwa nchi nzima ikiwa ni pamoja na viwanda vya Mafuta Ilulu na kubangua korosho - Nachingwea. Tathimini hiyo imeisaidia Serikali kuweka mikakati ya kufufua viwanda hivyo, ikiwemo kuvirejesha Serikalini na kuweka mazingira wezeshi ya kuvutia wawekezaji.

Mheshimiwa Naibu Spika, Kiwanda cha Korosho cha Nachingwea kimepata mwekezaji ambaye ni kampuni ya ANH & RAKA Ltd. ambaye amesaini Mkataba wa Pango kwa maana ya Lease Agreement na mamlaka ya EPZ tarehe 11 Desemba, 2023 kwa ajili ya kuchakata mazao ya kilimo ikiwemo korosho, ufuta na karanga.

Mheshimiwa Naibu Spika, vilevile Kiwanda cha Mafuta Ilulu kimepata mwekezaji kampuni ya MCL Agro Co. Ltd. ambaye amesaini Mkataba wa Pango yaani Lease Agreement na Mamlaka ya EPZ tarehe 28/3/2023 kwa ajili ya kuchakata mazao ya kilimo ya korosho, ufuta na karanga.

Mheshimiwa Naibu Spika, kwa sasa, wawekezaji hao wapo katika hatua mbalimbali za maandalizi ya kuanza uendelezaji. Aidha, kwa mujibu wa mikataba wawekezaji hao wanapaswa kuwa wameanza uzalishaji ndani ya miezi 24 kutoka tarehe ya kusaini mkataba, nakushukuru.

NAIBU WAZIRI, OFISI YA RAIS, MENEJIMENTI YA UTUMISHI WA UMMA NA UTAWALA BORA alijibu:-

Mheshimiwa Spika, awali ya yote naomba kwa ruhusa yako, kwa kuwa ni mara yangu ya kwanza kusimama katika Bunge lako Tukufu katika nafasi hii kama Naibu Waziri, Ofisi ya Rais, Menejimenti ya Utumishi wa Umma na Utawala Bora, nachukue fursa hii kwanza kumshukuru Mwenyezi Mungu, Mwingi wa Rehma kwa namna ambavyo amenijalia na leo nimesimama mbele katika Bunge lako Tukufu. (Makofi)

Mheshimiwa Spika, pili, namshukuru sana Rais wa Jamhuri ya Muungano wa Tanzania Mheshimiwa Dkt. Samia Suluhu Hassan kwa kuniamini na kuniteua kushika nafasi hii. Naomba nitoe ahadi kwake na kwa Watanzania kwamba nitaitumikia nafasi hii nikitanguliza uadilifu, uchapakazi na maslahi ya Taifa mbele. (Makofi)

Mheshimiwa Spika, tatu, nakushukuru wewe kwa miongozo yako na namna ambavyo umeendelea kutulea na Waheshimiwa Wabunge wote kwa namna ambavyo tumekuwa tukishirikiana kwa pamoja. (Makofi)

Mheshimiwa Spika, mwisho, wananchi wangu wa Jimbo la Kwela ambao wamenifanya niwepo ndani ya Bunge hili niwaahidi nitaendelea kuwatumikia na kutanguliza yale waliyokuwa wamenituma ndani ya Bunge hili. (Makofi)

Mheshimiwa Spika, baada ya maneno hayo ya utangulizi naomba kwa niaba ya Waziri wa Nchi, Ofisi ya Rais, Menejimenti ya Utumishi wa Umma na Utawala Bora, nijibu swali la Mheshimiwa Amandus Julius Chinguile, Mbunge wa Jimbo la Nachingwea kama ifuatavyo: -

Mheshimiwa Spika, kwa mujibu wa Sera ya Menejimenti ya Ajira katika Utumishi wa Umma ya Mwaka 2008 Toleo la pili aya ya 4.2, nafasi za ajira hutolewa kwa ushindani na kwa kuzingatia sifa stahiki kwa mujibu wa miundo ya maendeleo ya utumishi wa kada husika. Vilevile nafasi za wazi za ajira hutolewa kwa kuzingatia ikama ya watumishi katika taasisi husika ambayo imejumuishwa katika mahitaji halisi yaliyopo katika taasisi husika.

Mheshimiwa Spika, kwa mujibu wa hati idhini iliyoidhinishwa kila taasisi mahitaji ya watumishi katika taasisi moja hutofautiana na taasisi nyingine kutokana na sababu mbalimbali ikiwemo ukubwa wa taasisi na uwingi wa majukumu. Aidha, idadi ya Taasisi za Umma zinatofautiana kwa kila jimbo; kwa misingi hiyo, idadi ya nafasi za ajira hutofautiana jimbo moja na jimbo lingine.

Mheshimiwa Spika, kutokana na maelezo hayo katika mwaka wa fedha 2024/2025, Serikali imetoa kibali cha ajira na nafasi 47,404 za ajira mpya kwa waajiri wote ambapo kila mwajiri katika kila jimbo amepata nafasi kwa kuzingatia ikama ya watumishi katika maeneo hayo. Aidha, katika kutekeleza kibali hicho Serikali kupitia Sekretarieti ya Ajira kwa watumishi wa umma imetangaza nafasi kada ya Elimu na afya kimkoa na usaili utafanyika katika ngazi ya mkoa, nashukuru.

NAIBU WAZIRI WA FEDHA alijibu: -

Mheshimiwa Naibu Spika, uhakiki wa wastaafu wanaolipwa na Hazina umekuwa ukifanyika katika ngazi ya halmashauri. Hata hivyo, ili kupunguza gharama za wastaafu kwenda kujihakiki na kuwaondolea usumbufu wa kusafiri umbali mrefu ili kupata huduma ya kuhakikiwa, Serikali inatengeneza mfumo wa kidigitali utakaowawezesha wastaafu kujihakiki wenyewe kupitia simu zao za mkononi au kwa kutumia huduma za kibenki.

Mheshimiwa Naibu Spika, baada ya kukamilika kwa taratibu zote wastaafu watapewa elimu ya jinsi ya kujihakiki wenyewe na watatangaziwa siku ya kuanza kujihakiki, ahsante. (Makofi)

WAZIRI WA VIWANDA NA BIASHARA alijibu: -

Mheshimiwa Naibu Spika, nakushukuru, Serikali ilifanya zoezi la tathmini na ufuatiliaji kwa viwanda vyote vilivyobinafsishwa nchi nzima ikiwa ni pamoja na viwanda vya Mafuta Ilulu na kubangua korosho - Nachingwea. Tathimini hiyo imeisaidia Serikali kuweka mikakati ya kufufua viwanda hivyo, ikiwemo kuvirejesha Serikalini na kuweka mazingira wezeshi ya kuvutia wawekezaji.

Mheshimiwa Naibu Spika, Kiwanda cha Korosho cha Nachingwea kimepata mwekezaji ambaye ni kampuni ya ANH & RAKA Ltd. ambaye amesaini Mkataba wa Pango kwa maana ya Lease Agreement na mamlaka ya EPZ tarehe 11 Desemba, 2023 kwa ajili ya kuchakata mazao ya kilimo ikiwemo korosho, ufuta na karanga.

Mheshimiwa Naibu Spika, vilevile Kiwanda cha Mafuta Ilulu kimepata mwekezaji kampuni ya MCL Agro Co. Ltd. ambaye amesaini Mkataba wa Pango yaani Lease Agreement na Mamlaka ya EPZ tarehe 28/3/2023 kwa ajili ya kuchakata mazao ya kilimo ya korosho, ufuta na karanga.

Mheshimiwa Naibu Spika, kwa sasa, wawekezaji hao wapo katika hatua mbalimbali za maandalizi ya kuanza uendelezaji. Aidha, kwa mujibu wa mikataba wawekezaji hao wanapaswa kuwa wameanza uzalishaji ndani ya miezi 24 kutoka tarehe ya kusaini mkataba, nakushukuru.