MHE. SALUM MOHAMMED SHAAFI: Mheshimiwa Mwenyekiti, kwa kucheleweshwa huko kuundwa akaunti ya fedha ya pamoja ya Serikali, je, Serikali haioni kwamba haina nia njema ya ufunguaji wa akaunti hii?
Mheshimiwa Mwenyekiti, swali la pili, ufunguaji wa akaunti hii ya fedha ya pamoja ni takwa la kikatiba na siyo la kimashauriano. Nataka kufahamu, ni sababu zipi zilizosababisha mashauriano hayo kutokukamilika hadi leo? Ahsante. (Makofi)
NAIBU WAZIRI WA FEDHA: Mheshimiwa Mwenyekiti, naomba kujibu maswali mawili ya nyongeza ya Mheshimiwa Al-imam Shaafi kama ifuatavyo:-
Mheshimiwa Mwenyekiti, Serikali ina nia njema kabisa na Mheshimiwa Mbunge mwenyewe ni shahidi kwamba ndani ya Jamhuri ya Muungano tulikuwa na changamoto 25, lakini 21 tayari zimeshapatiwa ufumbuzi, yaliyobaki ni machache na Serikali ipo katika mchakato wa kukamilisha na kupata ufumbuzi wa hizo nne. (Makofi)
Mheshimiwa Mwenyekiti, nikijibu swali la pili, kila kitu kinahitaji utaratibu, kufuata kanuni na mashauriano. Kwa hiyo, namhakikishia Mheshimiwa Mbunge kwamba akaunti hiyo haitecheleweshwa, awe na subira na itafunguliwa baada ya pande mbili kukamilika. (Makofi)