MHE. AMINA BAKARI YUSSUF: Mheshimiwa Spika, nachukua fursa hii kumpongeza Mheshimiwa Waziri wa Nishati, Mheshimiwa Kalemani kwa kazi kubwa na ngumu anayoifanya katika Wizara hii yeye pamoja na watendaji wake wote katika Wizara ya Nishati.

Mheshimiwa Spika, kwa kuwa Wizara hii ni pekee ambayo asilimia 98.9 ya bajeti yake yote ni kwa ajili ya utekelezaji wa miradi ya maendeleo, hivyo basi, nashauri Serikali kutoa fedha kwa wakati ili kutekeleza kwa ufanisi miradi yote ya maendeleo na ya kimkakati iliyo chini ya Wizara ya Nishati.

Mheshimiwa Spika, mradi wa bwawa la umeme wa maji la Julius Nyerere Mkoa wa Pwani Rufiji unatekelezwa na Serikali kupitia TANESCO na unategemewa kuzalisha umeme wa maji wenye uwezo wa kuzalisha MW 2,115 na Unit bilioni 6.307 za umeme kwa mwaka. Pia kitu cha kufurahisha zaidi ni kwamba mradi huu unatekelezwa kwa fedha za ndani kwa asilimia mia moja; na mkandarasi hadai hata shilingi.

Mheshimiwa Spika, naiomba Serikali kuwa, mradi huu utengenezewe mazingira mazuri ili kuwa kivutio cha utalii na kuongeza pato la Taifa, ukizingatia mradi huu umo ndani ya hifadhi ya mbuga ya Selous. Mradi huu wa bwawa la umeme wa maji la Julius Nyerere, una faida nyingi kwa Watanzania, kwani wasimamizi wa mradi huu ni Watanzania wenyewe. Pia mradi huu utaongeza ujuzi na uwezo kwa vijana wetu nchini na kuongeza fursa za ajira.

Mheshimiwa Spika, itasaidia kukuza pato la Serikali na Shirika la TANESCO kwa kuuza unit nyingi za umeme (kwh) zipatazo shilingi bilioni 6.307 kwa mwaka. Pia itapelekea kupunguza matumizi ya nishati ya kuni na mkaa kwa kupata umeme wa gharama nafuu na wa uhakika. Hivyo basi, ili miradi ikamilike kwa wakati, lazima Serikali iwasimamie vizuri Wakandarasi waliopewa miradi hiyo, wafanye kazi ipasavyo ili kupata ufanisi wa miradi ya maendeleo.

Mheshimiwa Spika, nalishauri Bunge lako Tukufu kuwa kuna haja ya kuandaa ziara ya kwenda kuona mradi wa bwawa la umeme wa maji la Julius Nyerere Rufiji ili Wabunge wakaone jinsi Serikali inavyofanya kazi nzuri nchini.

Mheshimiwa Spika, naomba kuwasilisha. Naunga mkono hoja. Ahsante sana.

MHE. AMINA BAKAR YUSSUF: Mheshimiwa Mwenyekiti, nampongeza Rais wa Jamhuri ya Muungano wa Tanzania Mheshimiwa Dkt. Samia Suluhu Hassan kwa kazi kubwa na nzuri anayoifanya hasa katika Wizara hii.

Mheshimiwa Mwenyekiti, nampongeza Mheshimiwa Waziri pamoja na wasaidizi wake wote kwa kazi kubwa wanayoifanya ndani ya Wizara hii.

Mheshimiwa Mwenyekiti, naishauri Serikali, Jeshi la Polisi lisimamie vyema usalama barabarani kwa kuzingatia Sheria za Usalama Barabarani hasa kwa vyombo vya moto vikiwemo bodaboda wamekuwa wakivunja sheria sana bila kujali usalama wao na raia wengine na kupelekea ongezeko la ajali barabarani.

Mheshimiwa Mwenyekiti, nalishauri Jeshi la Polisi wasimamie inavyostahili ili waweze kuzingatia sheria, taratibu, miiko, weledi na maadili ya Jeshi la Polisi katika utekelezaji wa kazi zao.

Mheshimiwa Mwenyekiti, Serikali iendelee kuviwezesha vyombo vyo ulinzi na usalama kwa kuajiri askari wengi zaidi ili kuimarisha utendaji kazi wa vyombo hivyo.

Mheshimiwa Mwenyekiti, naunga mkono hoja, ahsante.

MHE. AMINA BAKAR YUSSUF: Mheshimiwa Spika, naanza kwa kumpongeza Mheshimiwa Rais wa Jamhuri ya Muungano wa Tanzania, Mama yetu Dkt. Samia Suluhu Hassan kwa kazi kubwa na nzuri anayoifanya hasa katika Wizara hii ya Elimu kwa Watanzania.

Mheshimiwa Spika, pia nampongeza Mheshimiwa Waziri wa Elimu, Naibu Waziri pamoja na wasaidizi/watendaji wake wote wa Wizara hii ya Elimu, Sayansi na Teknolojia kwa kazi kubwa wanayoifanya ndani ya Wizara hii.

Mheshimiwa Spika, nianze mchango wangu kuhusu mfumo wetu wa elimu nchini ambao haumwandai mwanafunzi kuweza kujitegemea mara baada ya kumaliza masomo yake. Hivyo basi, kuna haja ya kuboresha mfumo wetu wa elimu nchini ili mfumo wa elimu uweze kumwandaa mwanafunzi kuweza kujitegemea mara baada ya kumaliza masomo yake bila ya kusubiri kuajiriwa.

Mheshimiwa Spika, naishauri Serikali kupitia Wizara kupeleka vifaa vya kisasa vya kufundishia kwa walimu na wanafunzi kwa wakati shule zote nchini, pia Wizara iboreshe mazingira wezeshi kwa walimu kutokana na mazingira yaliyopo maeneo yao hasa vijijini.

Mheshimiwa Spika, kwa kuwa kuna changamoto ya ukosefu wa ajira nchini, naishauri Serikali kupitia Wizara hii ya Elimu, Sayansi na Teknolojia iboreshe na iongeze kujenga Vyuo vya Elimu Amali/Vyuo vya Kati kote nchini, pamoja na kupeleka vifaa vya kisasa vya kufundishia ili kuzalisha wataalam wengi wa fani mbalimbali bobezi. Hii itasaidia jamii kuthamini vyuo hivyo vya kati na vijana wengi kujiunga na kunufaika kwa wingi zaidi na itasaidia sana kupunguza wimbi kubwa la vijana wasio na ajira, vijana wazururaji pamoja na vijana wanaosubiri ajira Serikalini, na pia itapunguza mzigo mkubwa kwa Serikali.

Mheshimiwa Spika, licha ya maboresho mengi ya mitaala na Sera ya Elimu kufanyika, ni vyema Wizara ikawawekea wanafunzi somo maalum la stadi za maisha, stadi za kazi, pamoja na somo la uzalendo ili kuwajenga watoto kuitambua nchi yao kiundani pamoja na kujitambua wao wenyewe ili wawe raia wema na kuwa wazalendo wa nchi yao, kwa sababu vijana wengi waliosoma, wakirudi mitaani wanafanya matukio ya ajabu ajabu yakiwemo wizi na mauaji. Hii yote inasababishwa na kukosa uzalendo na kutokujitambua.

Mheshimiwa Spika, pia kuna haja ya kuwapunguzia mzigo mkubwa wa idadi ya masomo watoto ili kuwapa wepesi katika ufahamu wa masomo yao na wanachokisoma.

Mheshimiwa Spika, naunga mkono hoja, ahsante sana.