Name

Khadija Shaaban Taya

Gender

Female

Party

CCM

Constituent

Special Seats

Primary Question

MHE. KHADIJA S. TAYA: Mheshimiwa Spika, nashukuru sana kupata fursa hii kumuuliza swali Mheshimiwa Waziri Mkuu. Kumekuwa na changamoto ya watoto wenye ulemavu kutokupata huduma za kunyooshwa na kurekebishwa viungo katika maeneo mbalimbali nchini. Sasa hii inapelekea ongezeko kubwa la watoto wenye ulemavu na ongezeko la watu wenye ulemavu. Je, ni upi mkakati wa Serikali kuhakikisha wanaweka vituo katika kila mkoa ili mtoto pale anapozaliwa aweze kupata huduma hii? Ahsante. (Makofi)

Name

Kassim Majaliwa Majaliwa

Gender

Male

Party

CCM

Constituent

Ruangwa

Answer

WAZIRI MKUU: Mheshimiwa Spika, naomba kujibu swali la Mheshimiwa Kadija Taya, maarufu Keysha, Mbunge Viti Maalum kama ifuatavyo:-

Mheshimiwa Spika, masuala ya afya hapa nchini kwa sasa yameimarishwa sana na uwekezaji mkubwa umefanywa. Kwa mujibu wa tafiti zetu ndani ya Wizara ya Afya imeelezwa kwamba hatua mbalimbali za mama mjamzito kabla hajajifungua zinaweza kubaini aina ya ulemavu wa mtoto alionao na uwezekano wa kupunguza ulemavu kwa zaidi ya 80% inawezekana. Kwa maana hiyo kwa uwekezaji ambao sasa Serikali umeufanya kutoka ngazi ya zahanati, vituo vya afya lakini hospitali za wilaya, hospitali za mkoa, kanda na kitaifa; siyo tu kuamua hospitali moja katika mkoa ndiyo iwe inashughulika na kutoa huduma kwa walemavu, ni vituo vyote vinavyotolea huduma vinatakiwa kupata vifaa na vifaa vimeshapatikana na sasa kila eneo huduma hii inaweza kutolewa ya kupunguza uwezekano wa mtoto kuwa na ulemavu kama nilivyosema ulemavu huu unaweza kuepushwa kwa zaidi ya 80%. (Makofi)

Mheshimiwa Spika, kwa hiyo huduma hizi zinapatikana sasa kuanzia vituo vya afya mpaka huko juu kwa kutoa wito kwa wamama wajawazito kuhudhuria kliniki ambayo itasaidia kupata elimu, lakini na uchunguzi wa mara kwa mara mpaka anapojifungua. (Makofi)

Mheshimiwa Spika, mtoto anapobainika amezaliwa ana ulemavu bado wataalam wetu wa afya kupitia vituo vyote vya utoaji huduma wanaweza kulifanyia kazi hilo kutoka umri mdogo wa mtoto mpaka umri ambao ulemavu huu unaweza ukapunguzwa kwa zaidi ya 80%. Kwa hiyo, nataka nimhakikishie Mheshimiwa Mbunge kwamba hili halihitaji ku-specialize hospitali moja kwenye eneo, kwenye mkoa ni kila eneo la utoaji huduma kuanzia zahanati na kuendelea. Pale ambapo mama anahudhuria kliniki tunaweza kubaini na tunaweza tukaanza kazi ya kuokoa ulemavu huo kwa zaidi ya 80%. Hayo ndiyo majibu ya Serikali. (Makofi)