Name

Subira Khamis Mgalu

Sex

Female

Party

CCM

Constituent

Special Seats

Primary Question

MHE. SUBIRA K. MGALU aliuliza:- Je, Serikali ina mpango gani wa kuanzisha Mradi wa Building a Better Tomorrow katika Bonde la Mto Rufiji?

Supplementary Question 1

MHE. SUBIRA K. MGALU: Mheshimiwa Naibu Spika, ahsante sana kwa kunipa nafasi niulize maswali mawili ya nyongeza. Kwanza, natoa pole kwa wananchi wenzangu wa Rufiji wakiwemo wanawake na watoto kwa janga kubwa la mafuriko linaloendelea kutokana na mvua nyingi. Pia nampa pole Mheshimiwa Mbunge wa Jimbo la Rufiji, Mheshimiwa Mchengerwa, lakini niishukuru sana Serikali kwa kutukimbilia kwa haraka kupitia Kitengo cha Maafa kwa Wilaya za Rufiji na Kibiti.

Mheshimiwa Naibu Spika, baada ya salamu hizo za pole, naomba sasa kuuliza maswali mawili ya nyongeza. Kwa kuwa kupitia ukurasa rasmi wa Mheshimiwa Waziri Bashe amefahamisha kwamba tarehe 20 Serikali itatangaza kazi ya ujenzi wa mabwawa ya umwagiliaji ya Ngorongo na Umwe; na kwa kuwa, mabwawa haya yanatarajia pia kushughulikia changamoto ya mafuriko; je, Serikali haioni sasa ipo haja ya Mradi huu wa BBT kwa Bonde la Rufiji hususan Wilaya ya Rufiji kwenda sambamba na ujenzi wa mabwawa haya ambayo yanatarajiwa kujengwa na Serikali? (Makofi)

Mheshimiwa Naibu Spika, swali la pili, kwa kuwa inapotokea mafuriko mashamba ya umwagiliaji yanapata changamoto kubwa ya kuharibiwa kwa mazao, kwa mfano Skimu ya Umwagiliaji ya Bagamoyo, inapotokea tatizo hilo wananchi hao wanaendelea kulipa tozo na ada mbalimbali kwenye Mfuko wa Umwagiliaji wa Taifa. Je, Serikali haioni ipo haja ya kuja na mwongozo kwamba, endapo kunatokea mafuriko na yanaharibu mashamba ya umwagiliaji na wananchi hawapati mazao, waweze kupewa nafuu katika tozo inayotakiwa kulipwa kwenye Mfuko wa Umwagiliaji wa Taifa kwa kuwa wamepata matatizo? Ahsante sana. (Makofi)

Name

David Ernest Silinde

Sex

Male

Party

CCM

Constituent

Tunduma

Answer

NAIBU WAZIRI WA KILIMO: Mheshimiwa Naibu Spika, ni kweli Wizara ya Kilimo kupitia Tume ya Taifa ya Umwagiliaji mwezi huu tutatangaza tender ya kujenga mabwawa makubwa mawili katika ile downstream ya Mwalimu Nyerere Hydropower hususan katika eneo la Ngorongo pamoja na Mbatia Mtuli eneo la Umbwe kama alivyoeleza Mheshimiwa Waziri, huo ndiyo msimamo na haya ni maelekezo ya Mheshimiwa Rais ambayo aliyatoa wakati ametembelea katika Bwawa la Mwalimu Nyerere. Kwa hiyo, hilo ni kweli na linakwenda kutekelezeka kuhakikisha kwamba tunapunguza athari za mafuriko katika eneo la Bonde la Mto Rufiji.

Mheshimiwa Naibu Spika, suala la pili kuhusu mwongozo, nimwambie tu Mheshimiwa Mbunge kwamba, ushauri wake tumeupokea na tutaufanyia kazi kwa sababu jukumu la Serikali ni kusikiliza wananchi wake. Ahsante.(Makofi)