Name

Joseph Anania Tadayo

Sex

Male

Party

CCM

Constituent

Mwanga

Primary Question

Mnada wa Mifugo Kata ya Kileo Mwanga Kufunguliwa MHE. JOSEPH A. TADAYO aliuliza:- Je, lini mnada wa mifugo uliojengwa kwa gharama ya shilingi milioni 600 katika Kata ya Kileo, Wilayani Mwanga utafunguliwa na kuanza kazi?

Supplementary Question 1

MHE. JOSEPH A. TADAYO: Mheshimiwa Naibu Spika, pamoja na majibu ya Serikali, naomba kuuliza swali na kusema yafuatayo:-

Mheshimiwa Naibu Spika, kwa kuwa mojawapo ya changamoto kubwa sana za Halmashauri ya Mwanga ni suala zima la mapato na wananchi wa Mwanga walikuwa wanasubiri sana mnada huu ufunguliwe ili waweze kupata mapato na kwa vile mnada huu kila kitu kilijengwa kipya kabisa, lakini kikaachwa na kutokufunguliwa mpaka leo vimechakaa.

Mheshimiwa Naibu Spika, na kwa kuwa sasa tunaambiwa mnada haufunguliwa kwa sababu ya choo tu, je, Mheshimiwa Naibu Waziri yuko tayari kuambatana nami mara baada ya Bunge hili kwanza, akaone hali halisi ilivyo na kwamba uhalisia siyo huo anaouzungumza na pili aturuhusu tukarabati kile choo kwa makubaliano kwamba anatupa tarehe ya kufungua ule mnada ili tuendelee kupata mapato kutoka kwenye chanzo kile kikubwa sana cha mapato? Ahsante sana. (Makofi)

Name

Alexander Pastory Mnyeti

Sex

Male

Party

CCM

Constituent

Misungwi

Answer

NAIBU WAZIRI WA MIFUGO NA UVUVI: Mheshimiwa Naibu Spika, moja niko tayari kuambatana na Mheshimiwa Mbunge baada ya Bunge hili Tukufu kukamilika vikao vyake, lakini pili, Wanamwanga kupitia halmashauri yao ya wilaya wanaruhusiwa kukarabati mnada huo kwa maeneo ambayo wanaona haya yana changamoto. Pia wanaruhusiwa kufanya ujenzi wa choo hicho, kwa sababu Serikali hii ni moja, siyo lazima kusubiri pesa zitoke Serikali Kuu ama zitoke Wizarani ndiyo ziende kufanya ukarabati katika mazingira ambayo wao wanaweza.

Mheshimiwa Naibu Spika, kwa hiyo, nimhakikishie Mheshimiwa Mbunge sisi kama Wizara tuko tayari kuwapa ushirikiano Halmashauri ya Mwanga, lakini maeneo ambayo wanaona wanaweza kufanya ukarabati ama wanaweza kujenga choo, sisi wala hatuna tatizo na hilo wanaweza wakaendelea na mnada ukaendelea kutumika kama kawaida, ahsante.

Name

Asia Abdulkarim Halamga

Sex

Female

Party

CCM

Constituent

Special Seats

Primary Question

Mnada wa Mifugo Kata ya Kileo Mwanga Kufunguliwa MHE. JOSEPH A. TADAYO aliuliza:- Je, lini mnada wa mifugo uliojengwa kwa gharama ya shilingi milioni 600 katika Kata ya Kileo, Wilayani Mwanga utafunguliwa na kuanza kazi?

Supplementary Question 2

MHE. ASIA A. HALAMGA: Mheshimiwa Naibu Spika, ahsante sana kwa kunipa nafasi ya kuuliza swali la nyongeza.

Mheshimiwa Naibu Spika, Wilaya ya Hanang ina ng’ombe zaidi ya 300,000 na tuna magulio 17. Je, ni lini Serikali itajenga miundombinu kwa Mnada wa Endasak na Katesh walau wa kuanzia?

Name

Alexander Pastory Mnyeti

Sex

Male

Party

CCM

Constituent

Misungwi

Answer

NAIBU WAZIRI WA MIFUGO NA UVUVI: Mheshimiwa Naibu Spika, ni kweli anavyosema Mheshimiwa Mbunge, Wilaya ya Hanang ina mahitaji makubwa ya ujenzi wa minada, lakini mchakato wa kibajeti huanzia chini. Wananchi wanapoanzisha mradi wao chini kwa mapendekezo katika mpango wa bajeti yakifika huku juu sisi tuko tayari kutekeleza ujenzi wa mnada huo.

Mheshimiwa Naibu Spika, kwa hiyo, nimuombe Mheshimiwa Mbunge arudi kule jimboni, awaeleze wananchi kwamba wanaweza kuanzisha mchakato wa mawazo ya kuanza kuingiza kwenye mpango wa bajeti ya mwaka 2024/2025 ili tuweze kuingiza kwenye mpango wa bajeti kuu, ahsante.

Name

Kavejuru Eliadory Felix

Sex

Male

Party

CCM

Constituent

Buhigwe

Primary Question

Mnada wa Mifugo Kata ya Kileo Mwanga Kufunguliwa MHE. JOSEPH A. TADAYO aliuliza:- Je, lini mnada wa mifugo uliojengwa kwa gharama ya shilingi milioni 600 katika Kata ya Kileo, Wilayani Mwanga utafunguliwa na kuanza kazi?

Supplementary Question 3

MHE. KAVEJURU E. FELIX: Mheshimiwa Naibu Spika, Wilayani Buhigwe kuna mnada wa Serikali ambao umejengwa na umekamilika takribani miaka mitatu sasa, lakini haujafunguli, lini utafunguliwa?

Name

Alexander Pastory Mnyeti

Sex

Male

Party

CCM

Constituent

Misungwi

Answer

NAIBU WAZIRI WA MIFUGO NA UVUVI: Mheshimiwa Naibu Spika, mnada huko Buhigwe kama umekamilika na miundombinu yote iko tayari na kama tayari Halmashauri ya Wilaya wameshakabidhiwa mnada huo, sisi Wizara hatuna kipingamizi chochote tunawaruhusu wanaweza kuendelea kuutumia kwa mujibu wa taratibu na sheria ambazo zipo, ahsante.

Name

Esther Nicholus Matiko

Sex

Female

Party

CHADEMA

Constituent

Special Seats

Primary Question

Mnada wa Mifugo Kata ya Kileo Mwanga Kufunguliwa MHE. JOSEPH A. TADAYO aliuliza:- Je, lini mnada wa mifugo uliojengwa kwa gharama ya shilingi milioni 600 katika Kata ya Kileo, Wilayani Mwanga utafunguliwa na kuanza kazi?

Supplementary Question 4

MHE. ESTHER N. MATIKO: Mheshimiwa Naibu Spika, Mnada wa Magena uliopo katika Halmashauri ya Mji wa Tarime ni mnada wa kimkakati kwa sababu upo mpakani. Serikali kupitia aliyekuwa Waziri kipindi hicho Mheshimiwa Mashimba walitembelea ule mnada na kuahidi kuboresha miundombinu ya mnada ule na kuanza kufanyakazi mara moja, lakini mpaka sasa hivi takribani miaka mitatu imeshapita mnada huo haujaanza kufanya kazi. Nataka kujua ni lini mnada huo utaanza kufanya kazi ili kuweza kuongeza pato la Taifa? (Makofi)

Name

Alexander Pastory Mnyeti

Sex

Male

Party

CCM

Constituent

Misungwi

Answer

NAIBU WAZIRI WA MIFUGO NA UVUVI: Mheshimiwa Naibu Spika, ni kweli Mheshimiwa Ndaki alitembelea mnada huo ambao uko Tarime na akatoa maelekezo mnada uanze kufanya kazi na mimi nasisitiza tena kuzielekeza Mamlaka za Serikali za Mtaa zinazohusika ambao ndiyo wasimamizi wa mnada huo kuanza mara moja matumizi ya mnada huo, ahsante.