Name

Saashisha Elinikyo Mafuwe

Sex

Male

Party

CCM

Constituent

Hai

Primary Question

MHE. SAASHISHA E. MAFUWE K.n.y. MHE. ESTHER E. MALLEKO aliuliza: - Je, upi mkakati wa Serikali kuongeza mauzo ya nyama nje ya nchi?

Supplementary Question 1

MHE. SAASHISHA E. MAFUWE: Mheshimiwa Naibu Spika, kwanza nashukuru sana kwa majibu mazuri ya Serikali kwa niaba ya Mheshimiwa Esther Malleko. Pamoja na mipango ambayo ameeleza hapa ya Serikali, Serikali inachukua hatua gani za haraka sasa kuhakikisha kwamba tunapata masoko nje ya nchi ikizingatiwa kwamba Tanzania ni nchi ya pili Afrika kwa wingi wa mifugo ili nyama yetu iweze kupata bei iliyo nzuri kwenye masoko ya dunia.

Mheshimiwa Naibu Spika, swali la pili, Serikali ilituelekeza Jimbo la Hai kuhakikisha tunaanza kuwekeza pesa kidogo kwa ajili ya kujenga machinjio ya kisasa pale KIA. Je, Serikali ipo tayari sasa kushirikiana na Halmashauri ya Wilaya ya Hai kujenga machinjio ya kisasa ili sasa nyama iweze kutengenezwa pale KIA na ipakiwe na ndege kwa Mikoa yote ya Kanda ya Kaskazini.

Name

Exaud Silaoneka Kigahe

Sex

Male

Party

CCM

Constituent

Mufindi Kaskazini

Answer

NAIBU WAZIRI WA VIWANDA NA BIASHARA: Mheshimiwa Naibu Spika, nakushukuru. Kwanza nimpongeze Mheshimiwa Mbunge kwa kuendelea kufuatilia kuhusiana na sekta hii ya mifugo hapa nchini.

Mheshimiwa Naibu Spika, ni kweli moja ya hatua tunazozifanya kama Serikali ni kutafuta masoko nje ya nchi na kupitia Taasisi yetu ya Maendeleo ya Biashara Nje (TANTRADE), tumeshaanza kuongea na kuingia makubaliano na baadhi ya nchi nje kwa ajili ya kupata masoko ya nyama ikiwemo Saudi Arabia, Qatar, Iran, China na nchi nyingine. Ambazo hizo kwa mfano, Saudi Arabia tu wanahitaji tani laki saba za nyama ya Ng’ombe kwa mwaka, kwa hiyo tumeshakubaliana nao tutaanza kuendelea kufanya hivyo.

Mheshimiwa Naibu Spika, Iran wanataka tani 70,000 kwa kila wiki, sasa tunachokifanya ni kuhakikisha tunawawezesha wananchi wetu wafuge kisasa ili nyama hizi zipate ithibati ili ziweze kuingia kwenye masoko hayo, lakini pia kwenye soko letu la Afrika tayari nako tumeshaanza kuingia ili kupata masoko ya nyama kwa maana ya kuuza nyama ambayo imechinjwa badala ya kuuza mifugo.

Kuhusu suala la pili ni kweli moja ya maeneo ambayo tunayafanyia kazi ya kimkakati ni kuongeza miundombinu wezeshi ambayo itafanya nyama yetu iwe na ubora unaotakiwa. Moja, ni majosho lakini kama nilivyosema ufugaji wa kisasa na machinjio ya kisasa. Sasa tumeshaanza kukaribisha wawekezaji kwenye machinjio ya kisasa lakini nimuahidi Mheshimiwa Mbunge kwamba, kwa sababu tayari katika Jimbo lake la Hai wameshaanza mchakato wa kujenga machinjio hayo ya kisasa, Serikali italeta fedha ili kuunga mkono machinjio hayo ili yaweze kukidhi ubora wa kutoa nyama yenye ubora kuingia kwenye masoko ya kimataifa, nakushukuru. (Makofi)