Name

Subira Khamis Mgalu

Sex

Female

Party

CCM

Constituent

Special Seats

Primary Question

MHE. SUBIRA K. MGALU aliuliza:- Je, Serikali imejipangaje kuanzisha mpango wa M-Mama katika maeneo ya Kibiti, Mafia na Mkuranga, ili kuzuia vifo vya akinamama wajawazito?

Supplementary Question 1

MHE. SUBIRA K. MGALU: Mheshimiwa Spika, ahsante sana kwa kunipa nafasi ya kuuliza maswali mawili ya nyongeza. Kwanza nianze kumshukuru Mheshimiwa Naibu Waziri kwa majibu mazuri kwa sababu, nimefuatilia, hasa maeneo ya visiwani, kama mpango huu kweli unaendelea. Maswali yangu mawili ni kama ifuatavyo:-

Mheshimiwa Spika, swali la kwanza; licha ya mpango huu wa M-Mama kufanya vizuri. Je, kuna sababu gani nyingine ambazo zimechangia kupunguza vifo vya akinamama wajawazito kutoka 556 kwa vizazi hai 100,000 hadi 104 kwa vizazi hai 100,000 kulinganisha na baadhi ya nchi ambazo zimeripoti vifo vya akinamama zaidi ya 386? (Makofi)

Mheshimiwa Spika, swali langu la pili; kwa kuwa, mpango huu wa M-Mama pia, una malengo ya kushughulikia changamoto za watoto wachanga wakiwemo watoto wanaozaliwa kabla ya muda, watoto njiti. Je, Serikali ina mpango gani wa kujenga vituo, kwa ajili ya watoto njiti kwa kuwa, vifo vya watoto njiti vinachangia 48% vya vifo vya watoto wote chini ya umri wa miaka mitano? Ahsante sana. (Makofi)

Name

Dr. Godwin Oloyce Mollel

Sex

Male

Party

CCM

Constituent

Siha

Answer

NAIBU WAZIRI WA AFYA: Mheshimiwa Spika, yes. Kwanza nianze kwa kumpongeza Mheshimiwa Mbunge, lakini niseme tu kwamba, kama mnakumbuka Rais wetu Dkt. Samia Suluhu Hassan alipohutubia kwa mara ya kwanza Bunge hili, akiwa amesimama hapo ulipo Mheshimiwa Spika, alipofika eneo la mama na mtoto alilisisitiza sana na kurudia mara mbili.

Mheshimiwa Spika, lakini hakuishia kwenye kusisitiza, ameleta shilingi trilioni 6.7 ambazo zimeenda kwenye maeneo ya miundombinu, teknolojia na pia, kufunza wataalamu na hizo fedha zote zimekwenda zikabadilisha, zikatutoa kwenye vifo 556 mpaka sasa tumefika vifo 104 na ni mfano wa kuigwa duniani. Kwa sababu tulikuwa na Mheshimiwa Waziri Mkuu kwenye Mkutano wa Umoja wa Mataifa ni Marais wawili tu walikuwa wanapewa, kwenye eneo la afya nishani, kwa ajili ya kufanya vizuri. Rais wetu Dkt. Samia Suluhu alikuwa anapewa nishani kwenye eneo hili na walipoona Rais wetu hakuwepo akasema wenyewe watakuja Tanzania, kwa ajili ya kumshukuru. Wanataka waonane naye physically na kumpongeza na kumpa hiyo nishani yeye mwenyewe kwa hiyo, ni kazi kubwa imefanyika. (Makofi)

Mheshimiwa Spika, pili, Mbunge amezungumzia eneo la watoto njiti. Rais wetu Dkt. Samia Suluhu Hassan ameshatutafutia shilingi bilioni 190. Siyo muda mrefu Waziri wetu tunaendelea na mchakato ndani ya Wizara ya Afya namna ya kujenga hivyo vituo vya watoto njiti na siyo muda mrefu Waziri wa Afya, Mheshimiwa Jenista Mhagama atakuja kutoa maelezo ni namna gani tunaweza kwenda mbele kwa kutumia hizo shilingi bilioni 190. (Makofi)