Name

Shally Josepha Raymond

Sex

Female

Party

CCM

Constituent

Special Seats

Primary Question

MHE. SHALLY J. RAYMOND aliuliza:- Je, wahitimu wangapi wa vyuo wanafanya kazi ya kujitolea na wangapi wameajiriwa na kujiajiri baada ya kujitolea?

Supplementary Question 1

MHE. SHALLY J. RAYMOND: Mheshimiwa Naibu Spika, ahsante kwa majibu mazuri. Naomba ufafanuzi kwa yafuatayo:-

Mheshimiwa Naibu Spika, swali la kwanza; kwenye ajira wametuelekeza kwamba vijana hawa wahitimu…

NAIBU SPIKA: Mheshimiwa, hebu isogeze mic yako vizuri.

MHE. SHALLY J. RAYMOND: Mheshimiwa Naibu Spika, kwenye ajira vijana wanaelekezwa waende kwenye Ajira Portal ili waweze kujisajili na kuomba ajira. Hapa tumezungumzia kuhusu kupata uzoefu ambao ni field, je, mifumo hii miwili inasomanaje ili kijana mhitimu ajue wazi anapataje kazi?

Mheshimiwa Naibu Spika, swali la pili; kwa kuwa si vijana wote waliohitimu wanafanikiwa kupata mafunzo yaani kupata field, wengine wako vijijini mbali sana, wamesubiri miaka mitatu, minne, mitano, hadi kufikia leo bado wanasubiri. Jana Serikali imetoa ajira nyingi sana, watanufaikaje wale ambao hawakwenda kwenye mfumo wa kujitolea?

Name

Deogratius John Ndejembi

Sex

Male

Party

CCM

Constituent

Chamwino

Answer

WAZIRI WA NCHI, OFISI YA WAZIRI MKUU, KAZI, AJIRA, VIJANA NA WENYE ULEMAVU: Mheshimiwa Naibu Spika, nikijibu maswali mawili ya nyongeza ya Mheshimiwa Shally Raymond, la kwanza hili la hii mifumo inasomekaje. Mfumo wa Ajira Portal ni mfumo ambao unatangaza ajira zote za umma, za Serikali ambapo pale hakuna upendeleo wowote. Iwe mhitimu yule aliyeenda kujitolea, ama mhitimu yule alifanyiwa mafunzo ya kuongeza ujuzi, pale wanakwenda kuomba kama waombaji wapya wa ajira hizi zilizotangazwa na Serikali.

Mheshimiwa Naibu Spika, mfumo ule unaratibiwa na wenzetu wa Ofisi ya Rais, Utumishi. Sasa hawa ambao wanafanyiwa mafunzo ambao nimewataja kwenye jibu langu la msingi wanakuwa wameongezewa skills za kuweza kuwa washindani wazuri katika eneo la ajira nchini, ambapo tunategemea sasa, pale wanapoitwa kwenye interview zile, wao watakuwa wana uwezo zaidi ku-demonstrate namna gani wamejiandaa kuweza kufanya kazi hizi. (Makofi)

Mheshimiwa Naibu Spika, ndiyo maana nimesema kazi hizi tunawajengea uwezo kwa ajili ya kufanya kazi Serikalini, sekta binafsi na nje ya nchi. Namtoa mashaka Mheshimiwa Shally Raymond kwamba tunakwenda kuhakikisha tunawajengea uwezo vijana wengi zaidi kuweza kuwa na zile skills za kuweza kuajiriwa Serikalini na kwingineko.

Mheshimiwa Naibu Spika, kwenye hili la kazi ambazo zimetangazwa jana na Ofisi ya Rais, Utumishi kwa vijana wa vijijini je, wananufaikaje. Ni kwenda kwenye Ajira Portal na kuweza kujaza zile nafasi ambazo zinatakiwa, vile vipengele na vigezo vinavyotakiwa kwa ajili ya kazi zile. Baada ya hapo, wenzetu Ofisi ya Rais, Utumishi, watafanya mchakato wao kupitia Sekretarieti ya Ajira na wale ambao watakuwa wamekidhi vile vigezo vya nafasi iliyotangazwa, basi wataitwa kwenye interview.

Mheshimiwa Naibu Spika, nawapongeza wenzetu wa Ofisi ya Rais, Utumishi, sasa hivi interview wanazifanya kikanda badala ya kuwakusanya wote mahali pamoja kwa mfano kuja hapa Dodoma na kadhalika. Naomba kuwasilisha.

Name

Condester Michael Sichalwe

Sex

Female

Party

CCM

Constituent

Momba

Primary Question

MHE. SHALLY J. RAYMOND aliuliza:- Je, wahitimu wangapi wa vyuo wanafanya kazi ya kujitolea na wangapi wameajiriwa na kujiajiri baada ya kujitolea?

Supplementary Question 2

MHE. CONDESTER M. SICHALWE: Mheshimiwa Naibu Spika, nakushukuru kwa nafasi. Kwa kuwa wako vijana wengi wa Kitanzania ambao katika kujitolea, wengine wamejitolea kuanzia miaka mitano mpaka saba. Kiukweli kitendo hiki kinavunja moyo sana vijana wa Kitanzania kujitolea. Je, Wizara mnaonaje kuwaandikia waraka halmashauri zetu nchini angalau kutenga fungu kidogo kwa ajili ya kuwasaidia vijana hawa kwa sababu nao pia ni binadamu, wana mahitaji yao, wana maisha yao, wana familia zao? Mtu hawezi kujitolea zaidi ya miaka mitano halafu hapati chochote. (Makofi)

Name

Deogratius John Ndejembi

Sex

Male

Party

CCM

Constituent

Chamwino

Answer

WAZIRI WA NCHI, OFISI YA WAZIRI MKUU, KAZI, AJIRA, VIJANA NA WENYE ULEMAVU: Mheshimiwa Naibu Spika, nikijibu swali la nyongeza la Mheshimiwa Sichalwe. Hili tutakaa na wenzetu wa Ofisi ya Rais, TAMISEMI na kuona ni namna gani ajira hizi ama hizi nafasi za kujitolea kwenye halmashauri zetu zinaweza kuratibiwa vizuri. Nafahamu kwamba kwenye taasisi mbalimbali za umma, wanayo programu hii ya internship ambayo saa nyingine wanatoa nauli ya wale wanaofanya ile internship kuweza kufika katika eneo la kazi.

Mheshimiwa Naibu Spika, hili tutakaa na wenzetu kama nilivyosema, Ofisi ya Rais, TAMISEMI, tuone linaratibiwaje vizuri kwa kushirikiana na wenzetu wa Ofisi ya Rais, Utumishi.

NAIBU SPIKA: Mheshimiwa Waziri, Ofisi ya Rais, Utumishi.

WAZIRI WA NCHI, OFISI YA RAIS, MENEJIMENTI YA UTUMISHI WA UMMA NA UTAWALA BORA: Mheshimiwa Naibu Spika, namshukuru Mheshimiwa Sichalwe kwa swali zuri na nampongeza sana Mheshimiwa Waziri kwa majibu mazuri sana. Huyu ni Mheshimiwa Naibu Waziri aliyetoka Utumishi, kwa hiyo anayajua. Ni kweli suala hili la kujitolea kwa watumishi linahitaji kufikiriwa sana. Nakumbuka Bunge hili lilituagiza tutengeneze Mwongozo wa kujitolea wa vijana wetu waliohitimu ambao wanajitolea katika meneo mbalimbali.

Mheshimiwa Naibu Spika, tunapoandaa huu Mwongozo, tumekutana na vitu vya kimgongano sana. Kwa mfano, wanaojitolea Serikalini na wanaojitolea kwenye private sector unawawekaje? Hili lenyewe limetupa kazi sana katika kulifikiria. Sasa hivi tumeshajiandaa, tuna-finalise na tumepeleka BAKITA wanatafsiri tu ile lugha, baadaye tutatoa huu Mwongozo na kila mmoja ataona. (Makofi)

Mheshimiwa Naibu Spika, hata hili alilouliza Mheshimiwa Sichalwe, katika huu Mwongozo, mojawapo ya mambo tuliyoyasema mle waziwazi ni namna gani hawa wanaojitolea watakuwa wanapata hata angalau malipo yanayoeleweka na kutakuwa kuna formular. Ahsante sana. (Makofi)