Makadirio ya Mapato na Matumizi ya Wizara ya Uchukuzi kwa Mwaka wa Fedha 2024/2025

MHE. BERNADETHA K. MUSHASHU: Mheshimiwa Spika, nampongeza Waziri, Naibu Waziri, Katibu Mkuu na watendaji wote katika Wizara hii kwa kazi nzuri mnayofanya. Aidha, namshukuru sana Rais wetu Dkt. Samia Suluhu Hassan kwa kutoa fedha nyingi kwenye Wizara hii kwani tunaona mambo mengi yanatekelezwa yakiwemo reli ya kisasa ya kati (SGR), ndege zinazonunuliwa, ujenzi wa meli kubwa kwenye Ziwa Victoria, uboreshaji wa bandari na ujenzi wa viwanja vya ndege.

Mheshimiwa Spika, dunia nzima imeathiriwa na mabadiliko ya tabia nchi, kila mahali athari zinaonekana kama mafuriko, ukame ulokithiri, vimbunga na milipuko ya magonjwa. Nawashukuru kwa kuona mbali, mkaiwezesha Mamlaka ya Hali ya Hewa kwa kuwawezesha na kuwapatia mitambo ya kisasa, wanafanya kazi nzuri sana, kuwapa Watanzania taarifa mapema ili wajiandae kukabiliana na matatizo kama kimbunga, mvua za El-Nino na kadhalika.

Mheshimiwa Spika, nilikwishachangia na kuomba mkaufungue Mkoa wa Kagera kwa kujengewa kiwanja kikubwa cha ndege pale Omukajunguti Missenyi. Huu ni mradi wa miaka mingi, lakini huwa hauanzi. Kagera wanalima ndizi, vanila, matunda na mbogamboga, vinaweza kusafirishwa hadi nje ya nchi. Mradi huu utafungua mkoa kiuchumi. Ni lini uwanja wa ndege wa Omukajunguti utaanza kujengwa?

Mheshimiwa Spika, naunga mkono hoja.