Makadirio ya Mapato na Matumizi ya Ofisi ya Rais, Tawala za Mikoa na Serikali za Mitaa kwa Mwaka wa Fedha 2024/2025

MHE. JOSEPH M. MKUNDI: Mheshimiwa Naibu Spika, nampongeza sana Mheshimiwa Rais Dkt. Samia Suluhu Hassan kwa kazi kubwa na mambo mengi makubwa aliyofanya kwa jimbo la Ukerewe katika sekta mbalimbali. Pia nampongeza Mheshimiwa Waziri na wasaidizi wote katika Wizara. Hata hivyo nina ushauri na maombi kadhaa kama ifuatavyo:-

Mheshimiwa Naibu Spika, kwanza nianze na maombi ya kutekelezwa kwa ahadi ya ujenzi wa kilometa mbili za barabara ya lami eneo la Bwisya iliyotolewa na Mheshimiwa Waziri Mkuu mwaka 2020; pili, kukamilishwa kwa maboma yaliyoanzishwa na wananchi kwenye Sekta ya Elimu na Afya jimboni Ukerewe; tatu, fedha za dharura kwa ajili ya kurekebisha miundombinu iliyoharibiwa na mvua ikiwemo barabara ya Bwisya - Nyamanga – Kome; na nne, kusaidia upatikanaji wa watumishi ili kukabiliana na upungufu uliopo kwenye Sekta za Afya na Elimu.

Mheshimiwa Naibu Spika, ushauri; Wizara isimamie vyema rasilimali zote zinazoletwa wilayani kuhakikisha zinasimamiwa vizuri; Wizara ikemee vitendo vya watendaji wenye madaraka kuwanyanyasa watumishi wasiokubaliana nao kimaslahi katika miradi jambo linalowakatisha tamaa watumishi, na kwa mfano, kuna mambo kadhaa yanayoendelea katika Ofisi ya Mkurugenzi dhidi ya watumishi wilayani Ukerewe inawakatisha tamaa na kuathiri ufanisi katika utendaji wao na baadhi kufanya jitihada za kuhama na kuathiri maisha ya wananchi.

Mheshimiwa Naibu Spika, naomba kuwasilisha.