Makadirio ya Mapato na Matumizi ya Wizara ya Elimu, Sayansi na Teknolojia kwa Mwaka wa Fedha 2024/2025

MHE. JUSTIN L. NYAMOGA: Mheshimiwa Spika, naomba kuchukua fursa hii kumshukuru Mheshimiwa Rais wa Jamhuri ya Muungano wa Tanzania kwa kazi kubwa sana katika sekta ya elimu hasa katika Jimbo la Kilolo ambapo kuna Chuo cha VETA kinajengwa, shule ya wasichana ya mkoa na mengine mengi.

Mheshimiwa Spika, katika Wizara hii naomba kutoa mchango wangu katika maeneo yafuatayo: Kwanza, kwa mara nyingine tena naomba kuendelea kushauri kuhusu umuhimu wa uwazi katika utoaji wa mikopo ya elimu ya juu. Uwazi ni pamoja na kutoa mrejesho, kwa nini mwombaji hajapata mkopo? Bado kumekuwa na malalamiko kwa wale wanaokosa na kudhani kwamba kuna upendeleo.

Mheshimiwa Spika, jambo la pili, naomba shule za watu wenye mahitaji maalum ziangaliwe. Shule hizi zina upungufu mkubwa wa vifaa kulingana na mahitaji yao. Serikali ichukue hatua za makusudi kwa ajili ya shule hizo.

Mheshimiwa Spika, baada ya kusema hayo, naunga mkono hoja.