Makadirio ya Mapato na Matumizi ya Wizara ya Ujenzi kwa Mwaka wa Fedha 2024/2025

MHE. JOSEPH M. MKUNDI: Mheshimiwa Spika, nashukuru kwa kunipa fursa hii ili niweze kutoa mchango wangu kwenye hotuba ya bajeti ya Wizara hii ya ujenzi.

Mheshimiwa Spika, kwanza, ninamshukuru Mwenyezi Mungu kwa fursa hii na nitumie nafasi hii kumpongeza sana Mheshimiwa Rais Dkt. Samia Suluhu Hassan kwa kazi kubwa sana anayoifanya, pamoja na changamoto mbalimbali lakini kwa muda huu mfupi aliokaa madarakani kazi kubwa sana imefanyika kuimarisha miundombinu yetu. Nisiwe mchoyo wa fadhila kwa kuwapongeza Mheshimiwa Waziri, Naibu wake, Katibu Mkuu na timu nzima, kwa kweli wanafanya kazi kubwa sana pamoja na changamoto kubwa wanazozipitia lakini wanafanya kazi kubwa sana, mnastahili pongezi.

Mheshimiwa Spika, nitakuwa mchoyo wa fadhila kama sitampongeza meneja wangu wa TANROADS Mkoa Mhandisi Ambrose, ni moja kati ya watendaji wahandisi wanaoifanya kazi kubwa sana. Amekuwa anatupa ushirikiano, mimi binafsi amekuwa ananipa ushirikiano mkubwa sana, kwa kweli anastahili pongezi. (Makofi)

Mheshimiwa Spika, kwa muda huu mfupi nita-concentrate kwenye Jimbo langu la Ukerewe. Moja ni kutoa shukrani. Tunayo barabara yetu ambayo ni sehemu ya barabara ya Bunda - Kisorya – Nansio, kwa muda mrefu sana ilikuwa ni tatizo kubwa lakini kwa namna ya pekee ndiyo maana nina kila sababu ya kumpongeza Mheshimiwa Rais, fupa ambalo limewashinda viongopzi wengi yeye safari hii ameliweza na hatimaye sasa barabara ile kilomita 12 inaanza kujengwa kwa kiwango cha lami. Nampongeza sana lakini nawapongeza sana Mheshimiwa Waziri na timu yake yote.

Mheshimiwa Spika, katika eneo hili naomba tu kushauri Mheshimiwa Waziri, wakati mkandarasi kafika site, basi alipwe pesa yake ya awali ili asikwame katika eneo lolote lile. Nashauri vilevile ubora wa kazi ile uwe ni wa kiwango cha juu, ina maana kuwe na usimamizi mkubwa, ingawa sina mashaka sana na Meneja wangu wa TANROADS Mkoa kama nilivyosema, kwa hiyo nasisitiza.

Mheshimiwa Spika, nashukuru sana kwa hatua iliyofikiwa sasa ya kuanza kutafuta fedha kwa ajili ya ujenzi wa daraja la Kisorya – Rugezi, ni hatua nzuri sana. Daraja lile ni muhimu sana kwa wananchi wa Ukerewe na hata Bunda kwa sababu ni kiunganishi kikubwa na ndiyo misingi wa uchumi wa maisha ya watu wa Ukerewe. Kuwepo kwa daraja lile kutaimarisha sana mawasiliano na uchumi wa wananchi wa Ukerewe. Kwa hiyo, nashukuru na napongeza na ingependeza sana kama vifaa vilivyoko Kigongo Busisi baada ya mradi ule kukamilika vikahamia pale ili kupiga ile kazi, ikafanyika mara moja na maisha yakaendelea. (Makofi)

Mheshimiwa Spika, eneo la pili ambalo ningependa kuchangia ni juu ya vivuko. Ukerewe ndiyo wateja wakubwa wa Wizara hii kwenye eno la TEMESA kwa upande wa vivuko. Nashukuru Kivuko cha Bukondo – Bwiru kinaendelea vizuri lakini pia Kivuko cha Kisorya - Rugezi. Naomba tu yale madai anayodai mkandarasi wetu Songoro Marine alipwe ili akamilishe kazi ile vivuko vile viende kutoa huduma kwenye maeneo yetu. (Makofi)

Mheshimiwa Spika, ukisoma Ilani yetu ya uchaguzi Ibara ya 57 (j) ambayo inaongelea vivuko; kwenye Ilani ya 2020/2025 tuliahidi wananchi kuanza kutengeneza vivuko nane. Katika vile vivuko nane tulivyoahidi, mojawapo ni kivuko cha Irugwa kwenda Murutanga na Kakukuru kwenda Ghana. Bado vivuko hivi havijaanza kutengenezwa.

Mheshimiwa Spika, wananchi wa Kisiwa cha Irugwa wanaishi maisha magumu sana. Wanapotaka kusafiri kuja Ukerewe inabidi wapite Jimbo la Musoma Vijijini, wapite Jimbo la Musoma, wapite Bunda, wapite Mwibara ndiyo warudi kuja kupata huduma Ukerewe. Kwa hiyo, ni muhimu sana kivuko hiki kikatengenezwa. (Makofi)

Mheshimiwa Spika, pia, wananchi wa visiwa vya Ghana, Kamasi na vinginevyo, visiwa vyote karibu saba, kutoka Kakukuru wanapata wakati mgumu sana kusafiri kwenye eneo lile. Ndiyo maana vivuko hivi ni muhimu sana. (Makofi)
Mheshimiwa Spika, kwa msingi huu na kama ilivyoelekeza Ilani, Mheshimiwa Waziri, mimi ningeomba kushauri. Kwa sababu kivuko cha Mv Ukara namba moja tayari kimeenda matengenezo na kwa mujibu wa hotuba yako, kimefikia asilimia 10. Vilevile, Kivuko cha Mv Nyerere nacho kiko matengenezo kinakaribia kukamilika. Mheshimiwa Waziri, ushauri wangu, vivuko hivi vikikamilika virudishwe Ukerewe ili kimoja kiweze kufanya kazi kati ya Irugwa kuja Murutanga na kingine kifanye kazi kati ya Kakukuru kwenda Ghana. Tutaokoa sana maisha ya watu wetu na vilevile kuimarisha uchumi wa wananchi wa Ukerewe. (Makofi)

Mheshimiwa Spika, bila kufanya hivyo mazingira yetu yatakuwa magumu sana. Ninaamini, Mheshimiwa Waziri sina mashaka na wewe kwa sababu kama nilivyosema, vivuko hivi vilikuwa vinafanya kazi Ukerewe, vimeenda matengenezo. Nishauri sana na niombe vikikamilika kutengenezwa virudi Ukerewe. Kimoja kifanye kazi kati ya Murutanga kwenda Irugwa na kingine kutoka Kakukuru kwenda Ghana kama nilivyoshauri. Litakuwa limefanyika jambo kubwa na la maana sana. (Makofi)

Mheshimiwa Spika, ombi langu, Mheshimiwa Waziri, tulizungumza juu ya barabara ya kutoka Bulamba kwenda Murutunguru – Bukonyo – Masonga kilometa 28. Ni barabara muhimu sana, ndiyo uti wa mgongo wa uchumi wa wananchi wa Ukerewe. Pamoja na kwamba wanapitia changamoto kubwa sana za kifedha lakini niombe tafadhali, hata kama ni kwa awamu, kwa sababu tunatumia pesa nyingi sana kutengeneza barabara ile kila wakati na ikitengenezwa muda mfupi baadaye inaharibika tena. (Makofi)

Mheshimiwa Spika, kwa hiyo, ushauri wangu, kama itawezekana tutafute rasilimali fedha ili tuwe tunaitengeneza hata kwa awamu ili mwisho wa siku barabara ile iweze kutengenezwa kwa kiwango cha lami na kuepusha gharama kubwa ambazo tunazitumia kwa ajili ya matengenezo ya mara kwa mara. (Makofi)

Mheshimiwa Spika, baada ya kusema hayo, ninaunga mkono hoja na Mwenyezi Mungu awabariki sana, ahsanteni sana. (Makofi)