Makadirio ya Mapato na Matumizi ya Wizara ya Ardhi, Nyumba na Maendeleo ya Makazi kwa Mwaka wa Fedha 2024/2025

MHE. SHAMSI VUAI NAHODHA: Mheshimiwa Mwenyekiti, naomba nianze mchango wangu kwa maneno ya Marehemu Mzee wetu Mwinyi: “Maisha ya binadamu ni hadithi tu hapa ulimwenguni, ewe ndugu yangu kuwa hadithi nzuri kwa watu watakaosimuliwa habari zako.” (Makofi)

Mheshimiwa Mwenyekiti, nimeona nianze kwa maneno haya ili kumkumbusha Mheshimiwa Waziri juu ya umuhimu wa Kiongozi kuacha alama nzuri katika uongozi wake. Kwa muda mrefu Waheshimiwa Wabunge tumekuwa tukiishauri Serikali kuipima ardhi yote ya Tanzania na kuweka mipango bora ya ardhi. Hakuna asiyejua nchi yetu inakabiliwa na migogoro mingi hasa kati ya wakulima na wafugaji kwa upande mmoja na wananchi na hifadhi za Taifa kwa upande mwingine.

Mheshimiwa Mwenyekiti, watu wenye mapenzi mema na Taifa hili tulitegemea kwamba tungetafuta ufumbuzi wa kudumu wa tatizo hili ili wananchi wetu wasiumizane na ufumbuzi wa kudumu upo katika kuipima ardhi yote ya Tanzania badala ya kupima kijiji kimoja kimoja. (Makofi)

Mheshimiwa Mwenyekiti, mwaka 2023 Wizara ilipata dola za Kimarekani 150,000,000 sawa na shilingi za Tanzania bilioni 405. Narudia, shilingi bilioni 405. Niliwahi kuzungumza na mtaalam mmoja wa upimaji akaniambia tunahitaji fedha kama shilingi bilioni 200 kwa ajili ya kuipima ardhi yote ya Tanzania. Sasa tunaweza kupima juu ya utekelezaji wa jambo hili, ni jambo ambalo linawezekana sana.

Mheshimiwa Mwenyekiti, sasa badala ya Wizara kuzitumia fedha hizi, shilingi bilioni 405 kwa ajili ya kuipima ardhi, Wizara inashauriwa na watendaji wake itumie zaidi ya 70% ya fedha za mkopo kwa ajili ya kujenga kumbi za mikutano, kulipa posho za wafanyakazi, kugharamia semina na kununua kompyuta. (Makofi)

Mheshimiwa Mwenyekiti, kwa maoni yangu, jambo hili siyo la busara hata kidogo. Hatuwezi kutumia fedha za mkopo kwa ajili ya shughuli za utawala. Kama Mheshimiwa Waziri ameshauriwa hivyo, nakumbuka maneno ya Mwalimu wangu akisema hivi; “Huu utakuwa ni mfano mzuri kwa ushauri mbaya aliopewa Mheshimiwa Waziri” Nasema, huu utakuwa ni mfano mzuri wa ushauri mbaya aliopewa Mheshimiwa Waziri, kwa hiyo, naomba autafakari vizuri. (Makofi)
Mheshimiwa Mwenyekiti, naomba nishauri mambo mawili. Jambo la kwanza, naiomba Wizara ipime ardhi yote ya Tanzania na kuainisha maeneo ya mashamba, viwanda, maeneo ya wafugaji na kuweka miji ya kisasa katika kila Mkoa. Tusipolifanya jambo hili sasa, hatutaweza kulifanya miaka 50 inayokuja, kwa sababu ardhi itakuwa imeharibiwa sana kutokana na ujenzi mbaya. (Makofi)

Mheshimiwa Mwenyekiti, jambo la pili, naishauri Wizara, tutoe hati tuwamilikishe wananchi wanaostahili ili tukusanye mapato ya kutosha kwa ajili ya kugharamia maendeleo ya Taifa letu na kujenga Taifa linalijitegemea. (Makofi)

Mheshimiwa Mwenyekiti, mwisho, naomba Mheshimiwa Waziri na watendaji wako mlisikilize vizuri. Naomba nirudie maneno ya Mzee Mwinyi: “Maisha ya binadamu ni hadithi tu hapa ulimwenguni, ewe ndugu yangu, kuwa hadithi nzuri kwa watu watakaosimuliwa hadithi yako.” Mheshimiwa Waziri nafikiri umenielewa.

Mheshimiwa Mwenyekiti, baada ya kusema hayo, naomba kuunga mkono hoja. (Makofi)