Makadirio ya Mapato na Matumizi ya Wizara ya Ardhi, Nyumba na Maendeleo ya Makazi kwa Mwaka wa Fedha 2024/2025

MHE. PRISCUS J. TARIMO: Mheshimiwa Spika, mchango wangu ni kuhusu Benki ya Nyumba ya Taifa. Watanzania asilimia kubwa wanajenga nyumba kwa fedha taslimu, hali hii inasababisha rushwa makazini, kwenye biashara na jamii kwa ujumla. Nyumba ni hitaji muhimu na la lazima, lakini ni ulinzi pia kwa familia. Ni vyema kuhakikisha kuwepo kwa benki ya nyumba au mfumo wa kibenki wa kutatua suala hili. Hapa ushauri wangu si kwa kuwapa fedha bali ni kwa kuwakopesha wenye viwanja vifaa vya ujenzi; kwa kutumia nyumba na kiwanja hicho kama dhamana na iwe ya muda mrefu kuanzia miaka 10 hadi 30 kwa wananchi. Hii itasaidia kuwapa amani Watanzania, lakini pia itasaidia kuongeza urari mifukoni mwa wananchi na kuchochea ukuaji wa uchumi wa nchi.