MHE. ANATROPIA L. THEONEST: Mheshimiwa Naibu Spika, nakushukuru. Napongeza uthubutu wa Serikali kubadilisha mitaala kwa lengo la kuboresha elimu, lakini tutambue pia kwamba katika shule, muda ni wa msingi.
Mheshimiwa Naibu Spika, ninavyoongea leo, kuna changamoto kubwa ya vitabu havijawafikia walengwa. Printing ya vitabu lakini pia vitabu kwenye shule wametumiwa softcopy, sasa vijijini watazitumiaje? Pia elimu haijafika. Naomba kujua mkakati wa Serikali, wakiangalia umuhimu wa muda, kwa sababu leo ni mwezi umetimia, shule zimefunguliwa. Ni upi mkakati wa haraka wa kuhakikisha vitabu vinafika na elimu inafika kwa wakati ili watoto waweze kupata elimu hiyo kwa wakati?
Mheshimiwa Naibu Spika, nakushukuru. (Makofi)
WAZIRI MKUU: Mheshimiwa Naibu Spika, naomba kujibu swali na kupokea ushauri kutoka kwa Mheshimiwa Anatropia. Kwanza nimhakikishie kuwa tumeendelea kuzalisha vitabu kulingana na mahitaji ya mtaala tulionao. Wakati huu tunapoanza kufundisha kwa Sera mpya ya Elimu kwenye mitaala mipya, kwenye mipango yetu ya bajeti, ndiyo tumesema tumeanza awamu kwa awamu. Hatukuanza full string, yaani hatukuanza madarasa yote. Tumeanza na awali, darasa la kwanza, darasa la tatu, na kidato cha kwanza kwa sekondari.
Mheshimiwa Naibu Spika, kwa hiyo, tumeanza hivyo ili kujipa uwezo wa kupata vifaa, miundombinu ikiwemo na vitabu vya kujifunzia na kufundishia. Mkakati huu kama nilivyosema mwanzo kwamba tunaendelea kuongeza uwezo wa Serikali kibajeti kila mwaka ili kusheheneza maeneo haya, kumfanya mwanafunzi aweze kuipata ile elimu na aendelee nayo hata kule mwisho anapopimwa, apimwe akiwa ana uelewa na mahali pa kupata vitabu.
Mheshimiwa Naibu Spika, pia Wizara ya Elimu imeweka mpango wa kuimarisha elimu ya TEHAMA ambayo pia itasaidia wanafunzi kupata taaluma hiyo kupitia mitandao yetu na kumwezesha kuwa na uwanda mpana wa kupata elimu kwa vitabu ambavyo tunapeleka, na hata kwenye mitandao ili iweze kumsaidia kuelewa zaidi.
Mheshimiwa Naibu Spika, huo ndiyo mpango wetu wa Serikali.
MHE. ANATROPIA L. THEONEST: Mheshimiwa Spika, nakushukuru sana. Mheshimiwa Waziri Mkuu, katika siku za hivi karibuni kumekuwepo na matukio ambayo yanaashiria uvunjifu wa haki za binadamu. Matukio haya ni pamoja na mauaji, utekaji lakini pia utekaji na uuaji wa watoto. Matukio haya yamekuwa na sura tofauti tofauti ikiwepo wivu wa kimapenzi, lakini pia ushirikina na matukio mengine ya kutekwa na kupotea kwa watu yanahusishwa na vyombo vya dola.
Mheshimiwa Spika, nataka kujua mkakati wa Serikali, moja kuzuia matendo haya, lakini kuondoa taharuki ambayo inajitokeza kwenye jamii. Nakushukuru. (Makofi)
WAZIRI MKUU: Mheshimiwa Spika, nakushukuru sana kwa kuanza na ufafanuzi huo ili Watanzania waweze kujua. Nataka nieleze tu kwamba tunapoilinda nchi ni wajibu wetu Watanzania wote kwa kushirikiana na vyombo vyetu vya ulinzi na usalama.
Mheshimiwa Spika, tunavyo vyombo vya ulinzi na usalama nchini vyenye jukumu la kupokea taarifa mbalimbali zinazoonesha uvunjifu wa amani popote pale kadri taarifa zinavyokuja pale kwenye meza za vyombo vyetu vya ulinzi na usalama. Jukumu lao hawa wakishapokea taarifa ni kuhakikisha kwanza wanafanya uchunguzi na uchunguzi utakapobaini waliotenda makosa wanachukuliwa hatua kwa kupelekwa kwenye vyombo vya sheria.
Mheshimiwa Spika, Serikali hii ya Awamu ya Sita inayoongozwa na Rais wetu Mheshimiwa Dkt. Samia Suluhu Hassan, imeendelea kujikita kusimamia misingi ya amani katika nchi kwa mujibu wa sheria, kanuni na taratibu za nchi. Pia tumeendelea kujikita kwenye misingi yetu ya amani na ulinzi kwa gharama yoyote ile kuhakikisha kwamba mipaka yetu, raia wetu lakini na mali zao zinabaki kuwa salama na hiyo ndiyo inayoleta amani katika nchi. Kwa hiyo, niwahakikishie Watanzania kwamba suala la ulinzi na usalama bado lipo mikononi mwetu pamoja na vyombo vyetu vya ulinzi na usalama. (Makofi)
Mheshimiwa Spika, jukumu letu ni kuhakikisha kwamba tunasaidia vyombo vya ulinzi kwa kutoa taarifa zozote zile ambazo zinaleta tishio la amani katika nchi ili kuvisaidia vyombo vyetu viweze kuchukua tahadhari na hatua stahiki ili kuwabaini wale wote ambao wanasababisha kutokuwepo kwa amani kwenye nchi yetu.
Mheshimiwa Spika, pia nitoe wito kwa vyombo vya ulinzi na usalama kuendelea na wajibu wao wa kuhakikisha kwamba kila taarifa inayopatikana lazima ifanyiwe uchunguzi, lakini pia na kubaini wale wote ambao wanahusika kama wanapatikana wachukuliwe hatua mara moja. (Makofi)
Mheshimiwa Spika, kwa hiyo nashukuru sana kwa maelezo yako ya msingi ya awali ili kuondoa upotoshaji ambao unaweza kuwa unaendelea na kufanya vyombo vyetu vishindwe kufanya kazi yake halafu tukawavunja moyo hawa watu ambao wanafanya kazi masaa 24 kwa ajili ya ulinzi ambao leo unatufanya hapa tubaki salama.
Mheshimiwa Spika, nashukuru sana. (Makofi)