Name

Eng. Ezra John Chiwelesa

Gender

Male

Party

CCM

Constituent

Biharamulo Magharibi

Primary Question

MHE. ENG. EZRA J. CHIWELESA: Mheshimiwa Spika, ahsante sana kwa kunipa nafasi na mimi ya kumuuliza swali Mheshimiwa Waziri Mkuu. Mheshimiwa Waziri Mkuu ni dhahiri wote tunajua uwekezaji mkubwa ambao umefanywa na Serikali yetu hasa katika Bandari ya Dar es Salaam tukitegemea kwamba mizigo mingi inapita kwenye central corridor kuelekea katika nchi jirani hasa Burundi, Rwanda na maeneo mengine.

Mheshimiwa Spika, kumekuwa na check points za polisi zaidi ya 44, Mizani, TRA zaidi ya tatu lakini pia kuna mizani zaidi ya nane kwenye lane ya central corridor kutokea Bandari ya Dar es Salaam mpaka kuelekea Rusumo. Serikali kuweza kupunguza trans time na kuwasaidia wasafirishaji wasisafirishe mizigo kwa gharama hatimaye wakashindwa wakaona ni mzigo mkubwa. Ilianza kujenga one-stop inspection centers, tunacho cha Vigwaza pale Pwani lakini tuna kingine Dumila pale Morogoro. Kulikuwa na ujenzi ilibidi ufanyike Manyoni – Singida na ujenzi mwingine ilibidi ufanyike Nyakanazi – Biharamulo.

Mheshimiwa Spika, lakini baadhi ya vituo bado havijajengwa na ujenzi wake uliishia njiani umesimama. Sasa ili kuweka azma nzuri ya Serikali ni lazima vitu hivi vimalizike ili viweze kutusaidia kwenye kusafirisha hiyo mizigo na hatimaye uwekezaji tuliofanya kwenye Bandari ulipe kwa watu kupitisha mizigo katika Bandari yetu ya Dar es Salaam. Sasa ni nini kauli ya Serikali kwenye kumalizia ujenzi wa hivi vituo ili hatimaye Bandari yetu iweze kufanya kazi katika malengo ambayo Serikali inayatarajia? Ahsante sana. (Makofi)

Name

Kassim Majaliwa Majaliwa

Gender

Male

Party

CCM

Constituent

Ruangwa

Answer

WAZIRI MKUU: Mheshimiwa Spika, naomba kujibu swali la Mheshimiwa Engineer Chiwelesa, Mbunge wa Biharamulo, kama ifuatavyo:-

Mheshimiwa Spika, moja, uko mpango wa kuimarisha ukaguzi, lakini mbili mapato kupitia mizigo inayoingia ndani ya nchi kupitia Bandari ya Dar es Salaam na kwenda nje ya nchi yetu na inapita pia ndani ya nchi lakini pia kwenda kwenye mipaka yetu. Mkakati ambao Serikali umefanya ni kujenga vituo vya ukaguzi kwa malengo yote mawili, usalama lakini pia kupata mapato na vituo hivi vimejengwa kimkakati.

Mheshimiwa Spika, tunapopeleka magari Nchi za Burundi, Kongo na Rwanda za ukanda huu maana yake lazima tuimarishe vituo kwenye barabara kuu inayotoka Dar es Salaam inapita Dodoma - Singida na kwenda Mkoa wa Kagera kule Ngara kupitia Biharamulo, lakini pia hatujajenga kwenye barabara hii tu hata maeneo yote yanayoingia na kutoka kwenye mipaka yetu nchini kama vile Horohoro – Holili – Mtukula na huku Tunduma tunaimarisha, kujenga na kazi ya ujenzi inaendelea. (Makofi)

Mheshimiwa Spika, kwa kuwa tuna vituo vingi vina mahitaji haya yote na ni lazima tujenge vituo kwa ajili ya ukaguzi kwa usalama lakini pia kwa ajili ya mapato. Kazi ya ujenzi inaendelea na ujenzi huu unaendelea kadiri tunavyopata fedha za kujenga vituo hivi. Kwetu kama Serikali ni muhimu sana kwa usalama wa nchi lakini ni muhimu sana katika kukusanya mapato ipasavyo ili tuweze kutunisha mfuko wetu kwa ajili ya ujenzi wa miradi. (Makofi)
Mheshimiwa Spika, naomba kumhakikishia Mheshimiwa Mbunge kwamba mpango mkakati upo wa Ujenzi wa Vituo hivi vyote vya ukaguzi kwenye maeneo haya. Pia, sasa tumeamua tunapojenga katikati ya nchi tunajenga kwa umbali ambao hauwezi kuleta usumbufu kwa wasafirishaji kwa kukaguliwa kila mahali wanapopita bali watakuwa wanakaguliwa kwenye vituo hivyo maalumu kama vile Vigwaza, Dodoma labda Manyoni kama ulivyosema Manyoni na huko Nyakanazi – Biharamulo na hata kule mpakani Ngara.

Mheshimiwa Spika, tutaendelea kufanya haya kwa kuhamasisha mataifa ya nje kutumia Bandari yetu ya Dar es salaam na bado tunao mpango wa kuimarisha Bandari za Mtwara na Tanga na sasa Serikali inao mpango wa kujenga Bandari Bagamoyo na kule tutaimarisha hiyo corridor yote, kuhakikisha kwamba usalama wa nchi tunapoingiza nchi nyingi kuja kuchukua mizigo hapa unaimarika. Pia, upatikanaji wa mapato pia na wenyewe tunauimarisha. Kwa hiyo, mipango hii yote ipo ndani ya Serikali, nashukuru sana. (Makofi)