Name

Omar Issa Kombo

Sex

Male

Party

CCM

Constituent

Wingwi

Primary Question

MHE. OMAR ISSA KOMBO K.n.y. MHE. ABDI HIJA MKASHA aliuliza: - Je, Serikali ina mpango gani wa kurejesha huduma za Kibenki za CRDB, NMB na PBZ katika Wilaya ya Micheweni?

Supplementary Question 1

MHE. OMAR ISSA KOMBO: Mheshimiwa Mwenyekiti, ahsante. Pamoja na majibu mazuri ya Mheshimiwa Naibu Waziri, naomba niulize maswali mawili ya nyongeza kama ifuatavyo: -

Mheshimiwa Mwenyekiti, kwa kuwa awali huduma hii ilikuwa inapatikana kwenye Jimbo la Micheweni ambalo lipo Wilaya ya Micheweni; sambamba na hilo, Serikali ya Awamu ya Nane ya Mheshimiwa Dkt. Mwinyi imeweka maeneo ya Maziwang’ombe kama maeneo ya uwekezaji; miundombinu tayari ipo lakini pia kuna ujenzi wa Bandari Rasmi Shumba Mjini ambapo tunatarajia mzunguko wa fedha utakuwa mkubwa. Je, Serikali haioni haja ya kupeleka huduma hii ya Benki kwenye Makao Makuu ya Wilaya ambayo yako kwenye Jimbo la Micheweni? (Makofi)

Mheshimiwa Mwenyekiti, swali la pili. Kwa kuwa wananchi wa Wilaya ya Micheweni wanatumia benki nyingine ikiwemo CRDB na NMB na Mheshimiwa Waziri amesema wametia mkazo kwenye PBZ, je, hawaoni haja ya kuwapelekea wananchi wa Wilaya ya Micheweni huduma ya Benki nyingine ikiwemo CRDB na NMB? Ahsante. (Makofi)

Name

Hamad Hassan Chande

Sex

Male

Party

CCM

Constituent

Kojani

Answer

NAIBU WAZIRI WA FEDHA: Mheshimiwa Mwenyekiti, kabla ya kujibu maswali mawili ya Mheshimiwa Omar Issa, naomba nichukue fursa hii kumpongeza sana kwa namna anavyofanya kazi kwa ufanisi na kwa ufuatiliaji wa maendeleo ama wa huduma hizi za kibenki.

Mheshimiwa Mwenyekiti, kuhusu swali lake la kwanza. Serikali inatambua ukuaji wa uchumi uliopo katika Mji wa Micheweni ambao umechochewa na uongozi thabiti wa Mheshimiwa Rais wa Jamhuri ya Muungano wa Tanzania na Mheshimiwa Rais wa Zanzibar na Mwenyekiti wa Baraza la Mapinduzi. Hivyo, nimhakikishie Mheshimiwa Mbunge kwamba benki hizi zitaendelea kufanya utafiti na upembuzi yakinifu katika eneo la Mji wa Micheweni. Ikionekana tija ipo, basi huduma hiyo itafunguliwa.

Mheshimiwa Mwenyekiti, swali lake la pili. Benki zote hizo nyingine ambazo amezitaja CRDB na NMB zinaendelea kufanya tathmini katika Wilaya hiyo ya Micheweni, hivyo inawezekana baadaye kufungua Tawi la CRDB na NMB katika Wilaya hiyo. (Makofi)